(ភ្នំពេញ)៖ សភាយុវពាណិជ្ជករកម្ពុជា សាខាមេគង្គ (JCI Mekong) បានរៀបចំពិធីជួបជុំសមាជិកយ៉ាងអធឹកអធម ព្រមទាំងបានប្តេជ្ញាថា នៅឆ្នាំ២០២១៥នេះនឹងនាំយកភាពជាអ្នកដឹកនាំបែបឆ្នៃប្រឌិត សម្រាប់ការផ្លាស់ប្តូរជាវិជ្ជមាននៅក្នុងសហគមន៍។
ពិធីជួបជុំសមាជិកនៃសភាយុវពាណិជ្ជករអន្តជាតិកម្ពុជា សាខាមេគង្គ បានប្រព្រឹត្តទៅយ៉ាងរលូន នាថ្ងៃទី០៩ ខែកុម្ភៈ ឆ្នាំ២០២៥ នៅ The Waterside, Quayside ក្រោមប្រធានបទ «ការដឹកនាំប្រកបដោយភាពច្នៃប្រឌិតនឹងផលប៉ះពាល់» ដោយមាននការអញ្ជើញចូលរួមជាពិសេសពី លោកអ្នកឧកញ៉ា លី ហួរ អនុប្រធានសមាគមឧកញ៉ាកម្ពុជា តំណាងដ៏ខ្ពង់ខ្ពស់លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា, អ្នកឧកញ៉ា ហ៊ុន ឡាក់ អគ្គលេខាធិការសមាគមឧកញ៉ាកម្ពុជា រួមទាំងសមាជិក សមាជិកា នៃសភាយុវពាណិជ្ជករកម្ពុជាទាំង៦សាខា និងដៃគូសហការផងដែរ។
ក្នុងឆ្នាំ២០២៥ នេះសភាយុវពាណិជ្ជករកម្ពុជា សាខាមេគង្គ ប្តេជ្ញាថានឹងនាំយកភាពជាអ្នកដឹកនាំបែបឆ្នៃប្រឌិត សម្រាប់ការផ្លាស់ប្តូរជាវិជ្ជមាននៅក្នុងសហគមន៍។ គម្រោង JCI Mekong សម្រាប់ឆ្នាំ២០២៥នេះគឺផ្តោតលើគម្រោងអាជីវកម្ម ផលប៉ះពាល់សហគមន៍ ការអភិវឌ្ឍន៍បុគ្គល នឹងកិច្ចសហប្រតិបត្តិការអន្តរជាតិ ដើម្បីផ្តល់អំណាចដល់យុវជន។
អ្នកឧកញ៉ា គឹម សុខអេង បានបង្ហាញពីកិច្ចសហប្រតិបត្តិការ និងចក្ខុវិស័យជាយុទ្ធសាស្រ្តផងដែរ។ លោកបញ្ជាក់ថា ពិធីជួបជុំសមាជិកនៃសភាយុវពាណិជ្ជករអន្តជាតិកម្ពុជា សាខាមេគង្គនេះមិនមែនគ្រាន់តែជាពិធីមួយប៉ុណ្ណោះទេ ប៉ុន្តែជាការអំពាវនាវឲ្យមានសកម្មភាពបង្កើតការងារជាមូលដ្ឋាន ការបង្កើតថ្មី ក្រុមប្រឹក្សាភិបាលថ្មី នឹងសមាជិកធ្វើការរួមគ្នា ដើម្បីកសាងនិរន្តរភាពបន្ថែមទៀតទៅថ្ងៃអនាគត។
ជាមួយគ្នានេះ ក្នុងនាម JCI Mekong និងសហការីនៃ GMM 2025 លោកបានថ្លែងអំណរគុណយ៉ាងជ្រាលជ្រៅបំផុតដល់លោកអ្នកឧកញ៉ា លី ហួរ អនុប្រធានសមាគមឧកញ៉ាកម្ពុជា តំណាងដ៏ខ្ពង់ខ្ពស់លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា និងអ្នកឧកញ៉ា ហ៊ុន ឡាក់ អគ្គលេខាធិការ ព្រមទាំងអ្នកឧកញ៉ា ឧកញ៉ានៃសមាគមឧកញ៉ាកម្ពុជា រួមទាំងភ្ញៀវកិត្តិយសទាំងអស់ដែលបានអញ្ជើញចូលរួមក្នុងព្រឹត្តិការណ៍ GMM 2025 របស់ JCI Mekong ។
ក្នុងពិធីជួបជុំសមាជិកនៃសភាយុវពាណិជ្ជករកម្ពុជា សាខាមេគង្គនេះ ក៏មានពិធីចុះហត្ថលេខាលើ MOU ជាមួយដៃគូសហការសំខាន់ៗ ដើម្បីពង្រឹងបណ្តាញដ៏រឹងមាំដែលជាគោលដៅរបស់ JCI Mekong។ បន្ថែមពីនេះក៏មានការចុះហត្ថលេខាសហការផ្សព្វផ្សាយជាមួយបណ្តាញព័ត៌មាន Fresh News សារព័ត៌មាន Million Times និងរួមទាំង TWD ដែលជាដៃគូរចនាផងដែរ៕
