(រ៉ូម)៖ គេហទំព័រប្រមាណ២០របស់ប្រទេសអ៉ីតាលី ក្នុងនោះរួមទាំងគេហទំព័រធនាគារ និងអាកាសយានដ្ឋាន ត្រូវបានក្លាយជាគោលដៅដោយក្រុម Hacker ដែលគេបញ្ជាក់ថាគាំទ្រដោយរុស្ស៊ី, នេះបើតាមការឱ្យដឹងពី ទីភ្នាក់ងារសន្តិសុខតាមអ៉ីនធើណេតរបស់អ៉ីតាលី បានឱ្យដឹងនៅថ្ងៃចន្ទ, ដោយបានភ្ជាប់ជាមួយនឹងការវាយប្រហារ ពាក់ព័ន្ធនឹងភាពតានតឹងនាពេលថ្មីៗនេះ រវាងរដ្ឋាភិបាលទីក្រុង Rome និង Moscow។ នេះបើយោងតាមសារព័ត៌មាន Reuters ចេញផ្សាយនៅថ្ងៃទី១៧ ខែកុម្ភៈ ឆ្នាំ២០២៥។

កាលពីដើមខែនេះ, ប្រធានាធិបតីអ៉ីតាលី លោក Sergio Mattarella បានប្រៀបធៀបសង្គ្រាមរបស់រុស្ស៊ី លើអ៊ុយក្រែន ទៅនឹងការវាតទីនិយម នៃរបប Nazi របស់អាល្លឺម៉ង់ មុនសង្គ្រាមលោកលើកទី២។ ការលើកឡើងរបស់លោក បានធ្វើឱ្យទីក្រុង Moscow ខឹងសម្បារ, ប៉ុន្តែត្រូវបានការពារដោយនាយករដ្ឋមន្ត្រីអ៉ីតាលី លោក Giorgia Meloni។

ការវាយប្រហារតាមអ៉ីនធើណេតនៅថ្ងៃចន្ទ ត្រូវបានធ្វើឡើងដោយក្រុម Hacher ឈ្មោះ Noname057(16) គាំទ្រដោយរុស្ស៊ី ទៅលើគេហទំព័ររបស់អ៉ីតាលីជាច្រើន ដូចជា៖ Intesa Sanpaolo, Banca Monte dei Paschi, Iccrea Banca និងគេហទំព័ររបស់អាកាសយានដ្ឋាន Milan's Linate និងអាកាសយានដ្ឋាន Malpensa ផងដែរ ក្នុងចំណោមគេហទំព័រជាច្រើនទៀត, ប៉ុន្តែមិនបានបង្កការរំខានខ្លាំងនោះទេ។ នេះបើតាមការបញ្ជាក់ពី ទីភ្នាក់ងារសន្តិសុខតាមអ៉ីនធើណេត។

ទីភ្នាក់ងារសន្តិសុខតាមអ៉ិនធើណេតរបស់អ៉ីតាលី បានឱ្យដឹងថា ក្រុម Hacker បានជំរុញឱ្យមានការវាយប្រហារតាមអ៉ីនធើណេតរបស់ខ្លួន ដោយបញ្ជាក់ពីការអត្ថាធិប្បាយ របស់លោកប្រធានាធិបតី Mattarella។ កាលពីខែធ្នូ ក្រុម Noname057(16) បានអះអាងទទួលថាជាស្នាដៃរបស់ខ្លួន លើការវាយប្រហារតាមអ៉ីនធើណេតមួយទៀត លើអ៉ីតាលី ដោយកំណត់គោលដៅលើគេហទំព័ររបស់ស្ថាប័នប្រមាណ១០៕