(ដូហា)៖ ម្ចាស់មេដាយមាស Paris 2024 គឺ Novak Djokovic បានហាលអាវត្រឹមជុំទី១ វគ្គ ១៦នាក់ចុងក្រោយ នៃកម្មវិធី Qatar Open 2025 របស់ប្រទេសកាតា ក្រោយចាញ់គូប្រជែង Matteo Berrettini កាលពីរាត្រីថ្ងៃអង្គារម្សិលមិញ។

កីឡាករវាយកូនបាល់ទោល ឈរនៅលំដាប់លេខ៧ ពិភពលោកបច្ចុប្បន្ននេះ បានចាញ់គូប្រជែងមកពីអ៉ីតាលី Berrettini ក្រោមលទ្ធផលពិន្ទុ ៧-៦ (៧-៤) និង ៦-២ ដែលជាការប្រកួតលើកដំបូង គិតចាប់តាំងពីដកខ្លួនក្នុងវគ្គពាក់កណ្តាលផ្តាច់ព្រ័ត្រនៅព្រឹត្តិការណ៍ Australian Open ទល់នឹង Alexander Zverev នាអំឡុងខែមករាមក។

មុនការប្រកួតមកដល់ កីឡាករអន្តរជាតិស៊ែប៊ី Djokovic ក៏បានប្រកាសក្នុងសន្និសីទ ពីការបន្តយកអតីតគូប្រជែងលើទីលាន ៧សម័យ Andy Murray ដែលបានចូលនិវត្តន៍ពីអាជីពកីឡាករកាលខែសីហា ឆ្នាំទៅ បន្តធ្វើជាសមាជិកគ្រូបង្វឹកខ្លួនទៀតដែរ ពោលតពីខែចុងខែវិច្ឆិកា ឆ្នាំ២០២៤។

ក្រោយជ្រុះចេញពី Qatar Open 2025 ដែលមានតែវិញ្ញាសាវាយទោល និងវាយគូផ្នែកបុរស ធ្វើឡើងនៅទីក្រុង Doha ប្រទេសកាតា នឹងផ្តោតការប្រកួតនៅកម្មវិធីធំ French Open នៅបារាំងវិញម្តង ដែលនឹងចាប់ផ្តើមពីថ្ងៃទី២៥ ខែឧសភា ឆ្នាំ២០២៥ ដោយរូបគេព្យាយាមឈ្នះពានក្នុងកម្រិត Grand Slam លើកទី២៥ និងបំបែកកំណត់ត្រាចាស់កីឡាករអូស្រ្តាលី Margaret Court ទៀតផង៕