(ភ្នំពេញ)៖ ក្រុមហ៊ុន Grab ជាស៊ូភើអេប (Super App) ឈានមុខគេនៅក្នុងអាស៊ីអាគ្នេយ៍ កាលពីថ្ងៃទី២៦ ខែកុម្ភៈ ឆ្នាំ២០២៥នេះ បានចាប់ដៃគូជាមួយក្រុមហ៊ុន Overseas Cambodian Investment Corporation (OCIC) ដើម្បីបង្កើនការធ្វើដំណើរក្នុងទីក្រុងនៅកោះពេជ្រ ដែលជាសង្កាត់ពាណិជ្ជកម្មដែលមានការរីកចម្រើនលឿនបំផុតមួយរបស់រាជធានីភ្នំពេញ។ កិច្ចសហការនេះមានគោលបំណងធ្វើឱ្យប្រសើរឡើង នូវមធ្យោបាយធ្វើដំណើរ ផ្តល់អត្ថប្រយោជន៍ដល់អ្នករស់នៅ អាជីវកម្ម និងអ្នកទស្សនា ខណៈដែលគាំទ្រដល់ការអភិវឌ្ឍទីក្រុងកាន់តែទូលំទូលាយ។ រាជធានីភ្នំពេញបានឆ្លងកាត់ការពង្រីកទីក្រុងយ៉ាងសំខាន់ ដែលជំរុញដោយគម្រោងហេដ្ឋារចនាសម្ព័ន្ធថ្មីៗ ការបង្កើនតម្រូវការសម្រាប់ដំណោះស្រាយការធ្វើដំណើរថ្មី ដែលមានសារៈសំខាន់សម្រាប់សង្កាត់ពាណិជ្ជកម្ម និងសហគមន៍ដែលកំពុងរីកចម្រើន។

លោក កង សុវណ្ណារ៉ូត (Mike Kang) ប្រធាន Grab Cambodia បានថ្លែងថា ភាពជាដៃគូ Grab-OCIC នឹងណែនាំបទពិសោធន៍ដឹកជញ្ជូនដែលប្រសើរឡើង ដែលធ្វើឱ្យវាកាន់តែងាយស្រួលសម្រាប់មនុស្ស ក្នុងការស្វែងរករវាងកន្លែងសម្គាល់នានា។ ការប្តេជ្ញាចិត្តចំពោះការធ្វើដំណើរប្រកបដោយសុវត្ថិភាព ឆ្លាតវៃ និងងាយស្រួលជាងមុន «យើងមានសេចក្តីរំភើបរីករាយ ក្នុងការប្រកាសពីភាពជាដៃគូយុទ្ធសាស្រ្តរបស់យើងជាមួយក្រុមហ៊ុន OCIC ដើម្បីបង្កើនដំណោះស្រាយការធ្វើដំណើររបស់យើង ដោយចាប់ផ្តើមពីកោះពេជ្រ។ តាមរយៈការរីកលូតលាស់ និងអភិវឌ្ឍសេវាកម្មរបស់ Grab នៅក្នុងតំបន់នេះ យើងកំពុងផ្តល់នូវជម្រើសនៃការដឹកជញ្ជូនប្រកបដោយសុវត្ថិភាព និងងាយស្រួលសម្រាប់អ្នកស្នាក់នៅ និងអ្នកទស្សនា ខណៈពេលដែលមានការបង្កើតឱកាសរកប្រាក់ចំណូលបន្ថែម សម្រាប់ដៃគូអ្នកបើកបររបស់យើង។ ភាពជាដៃគូលើការធ្វើរដំណើរ គឺគ្រាន់តែជាការចាប់ផ្តើមប៉ុណ្ណោះ។ ឆ្ពោះទៅមុខ យើងនឹងធ្វើការរួមគ្នាបន្ថែមទៀតលើគម្រោងផ្សេងទៀត ដែលពាក់ព័ន្ធនឹងវិស័យអាជីវកម្មរបស់ Grab ដូចជា GrabFood និង GrabExpress ដែលផ្តល់ឱ្យអ្នកប្រើប្រាស់របស់យើងនូវភាពងាយស្រួល និងអត្ថប្រយោជន៍កាន់តែច្រើនតាមរយៈភាពជាដៃគូនេះ។ កិច្ចសហការនេះតំណាងឱ្យជំហានឆ្ពោះទៅមុខមួយទៀត នៅក្នុងចក្ខុវិស័យរួមរបស់យើង ដើម្បីបង្កើតប្រព័ន្ធដឹកជញ្ជូនប្រកបដោយប្រសិទ្ធភាព និងនិរន្តរភាព»។

ជាផ្នែកមួយនៃភាពជាដៃគូយុទ្ធសាស្ត្រនេះ Grab នឹងផ្តល់ការបញ្ចុះតម្លៃ៥0% (កំណត់ត្រឹម ៤,000រៀលក្នុងមួយលើក) រហូតដល់២លើក សម្រាប់អ្នកប្រើប្រាស់ម្នាក់។ ការប្រើប្រាស់សរុបសម្រាប់យុទ្ធនាការនេះគឺ ២,០០០ ដែលស្មើនឹងតម្លៃ ២,០០០ដុល្លារ។ ដើម្បីបង្កើនភាពងាយស្រួលរបស់អ្នកប្រើប្រាស់នៅពេលកក់ និងរង់ចាំដៃគូអ្នកបើកបរ Grab ចំណុចទទួល និងគោលដៅសម្រាប់អតិថិជនចំនួន១០ ត្រូវបានបង្កើនឡើងរួចហើយនៅទូទាំងកោះពេជ្រ។ ទាំងនេះរួមមាន Connexion Community Hub, Coconut Park, River Garden, Elysée Garden, Elysée, មជ្ឈមណ្ឌលពិព័រណ៍កោះពេជ្រ, Treelion Park, ផ្សាររាត្រីកោះពេជ្រ និងសាលាអន្តរជាតិកាណាដា។

លោក Thierry Tea អនុប្រធានក្រុមហ៊ុន OCIC បានថ្លែងថា «កោះពេជ្រ និងទីក្រុងភ្នំពេញកំពុងវិវត្តន៍យ៉ាងលឿន ជាមួយនឹងអ្នករស់នៅជំនាន់ថ្មី។ យើងមានគោលបំណងបង្កើនភាពចល័តក្នុងទីក្រុងនៅកោះពេជ្រ និងផ្តល់នូវបទពិសោធន៍អតិថិជនកាន់តែប្រសើរឡើង ដើម្បីបំពេញតម្រូវការដែលកំពុងកើនឡើងរបស់អ្នករស់នៅ និងអ្នកទស្សនា ដោយផ្តល់ជូននូវសេវាកម្មរួមបញ្ចូលគ្នា និងជម្រើសនៃការដឹកជញ្ជូនដែលសម្រួលដល់ជីវិតប្រចាំថ្ងៃ។ ក្នុងនាមជាក្រុមហ៊ុនកម្ពុជា យើងពិតជាផ្តល់តម្លៃដល់កិច្ចសហប្រតិបត្តិការ ជាមួយអ្នកដឹកនាំ និងអ្នកត្រួសត្រាយបច្ចេកវិទ្យាដ៏ធំបំផុតមួយរបស់អាស៊ី ដូចជា Grab ដែលពង្រឹងការប្តេជ្ញាចិត្តរបស់យើងក្នុងការលើកកម្ពស់ការច្នៃប្រឌិត និងការតភ្ជាប់»។

ការផ្លាស់ប្តូររបស់កោះពេជ្រ៖ គោលដៅសម្រាប់អាជីវកម្ម ការលំហែ និងសហគមន៍ ការផ្លាស់ប្តូរកោះពេជ្របានផ្តល់នូវមូលដ្ឋាន ឱ្យក្លាយជាលំនៅឋានសម្រាប់ប្រជាពលរដ្ឋជាង ១៥,០០០នាក់ អាជីវកម្មជាង១,០០០ និងបុគ្គលិកការិយាល័យចំនួន ៧,០០០នាក់។ ស្ពានដែលទើបសាងសង់ថ្មីឆ្ពោះទៅក្រុងកោះនរា បានកែលម្អផ្លូវចូលបន្ថែមទៀត ដោយមានមនុស្សរាប់ពាន់នាក់ឆ្លងកាត់ជារៀងរាល់ថ្ងៃ។ នៅពេលដែលសហគមន៍លំនៅដ្ឋាន និងអាជីវកម្មរបស់កោះពេជ្រកាន់តែរីកចម្រើន ជម្រើសអាហារ និងភេសជ្ជៈ (F&B) កាន់តែច្រើនកំពុងចូលមកបំពេញតម្រូវការដែលកំពុងកើនឡើង។ កាលពីដើមខែនេះ ហាងកាហ្វេ Starbucks Reserve បានបើកនៅកោះពេជ្រ ដោយបន្ថែមជម្រើសនៃហាងកាហ្វេដែលកំពុងកើនឡើងនៅក្នុងតំបន់។ នៅចុងសប្តាហ៍ កោះពេជ្រទាក់ទាញចំនួនមនុស្សយ៉ាងច្រើនសម្រាប់ព្រឹត្តិការណ៍ ការពិព័រណ៍ និងការប្រគំតន្ត្រីអន្តរជាតិ។

ការធានាបាននូវការតភ្ជាប់ដោយរលូន គឺជារឿងចាំបាច់ នៅពេលដែលមនុស្សកាន់តែច្រើនរស់នៅ និងធ្វើការនៅកោះពេជ្រ។ ភាពជាដៃគូនេះធ្វើឲ្យប្រសើរឡើងនូវជម្រើសនៃការដឹកជញ្ជូន ជួយឱ្យកោះពេជ្ររក្សាលំនឹងជាមួយនឹងការរីកចម្រើនរបស់ខ្លួន និងធ្វើឱ្យចលនាកាន់តែរលូនសម្រាប់មនុស្សគ្រប់គ្នា។ ដោយគាំទ្រកិច្ចខិតខំប្រឹងប្រែងទាំងនេះ ស្ថានីយ៍សាក EV នៅពីមុខ Connexion Community Hub រួមចំណែកបន្ថែមទៀតដល់ការចល័តទីក្រុងប្រកបដោយនិរន្តរភាពនៅក្នុងតំបន់។ ដោយសារប្រទេសកម្ពុជា កំពុងមានការអភិវឌ្ឍយ៉ាងឆាប់រហ័ស Grab និង OCIC នៅតែប្តេជ្ញាចិត្តក្នុងការពង្រឹងការធ្វើដំណើរក្នុងទីក្រុង គាំទ្រចលនាសេដ្ឋកិច្ច និងការលើកកម្ពស់ការតភ្ជាប់សម្រាប់អនាគតនៃកោះពេជ្រ៕