(បរទេស)៖ យោងតាមរបាយការណ៍ថ្មីមួយពីក្រុមហ៊ុនស្រាវជ្រាវ Consumer Intelligence Research Partners បានបង្ហាញថា ក្រុមហ៊ុនបច្ចេកវិទ្យាយក្ស Apple នឹងមានការកែប្រែកាលវិភាគប្រកាសបង្ហាញសម្រាប់ iPhone ជំនាន់ថ្មីម៉ូដែល​ «e» របស់ខ្លួន ពោលគឺនឹងមានចេញលក់ជារៀងរាលឆ្នាំ ខណៈ iPhone 17e អាចនឹងលេចចេញរូបរាងនៅឆ្នាំក្រោយ។ នេះបើយោងតាមការចេញផ្សាយដោយ​ GSMArena។

ដូចដែលប្រិយមិត្តបានជ្រាបរួចមកហើយ ថ្មីៗនេះ Apple បានប្រកាសបង្ហាញ iPhone 16e របស់ខ្លួន ដែលជាការផ្លាស់ប្តូរជាលើកដំបូង បន្ទាប់ពីត្រកូល iPhone SE ត្រូវបានលុបចោល។ ជំនាន់​ «e» ថ្មីនេះត្រូវបានគេឱ្យដឹងថា មានតម្លៃសមរម្យជាងមុន ហើយ Apple នឹងចេញលក់ជារៀងរាល់ឆ្នាំលែងឱ្យអ្នកគាំទ្ររង់ចាំយូរដូចមុនទៀតហើយ ខណៈដែលត្រកូល SE ត្រូវបានរង់ចាំដល់ទៅ ២ឆ្នាំ ឬយូរជាងនេះទើបបានចេញលក់ម៉ូដែលថ្មី។

គួរជម្រាបថា iPhone 17e នឹងមកដល់ក្នុងខែកុម្ភៈ ឆ្នាំ២០២៦ ខាងមុខនេះ បន្ទាប់ពី​ត្រកូល iPhone 17 បង្ហាញខ្លួនជាផ្លូវការក្នុងខែកញ្ញា ឆ្នាំនេះ។ នេះបើយោងតាមការបញ្ជាក់ពីរបាយការណ៍ Consumer Intelligence Research Partners៕