(បរទេស)៖ ថ្មីៗនេះ Google បានរាយការណ៍ទៅគណៈកម្មការសុវត្ថិភាព eSafety របស់អូស្ត្រាលីថា ខ្លួនបានទទួលពាក្យបណ្តឹងជាង ២៥០ នៅទូទាំងពិភពលោក ទាក់ទងនឹងការប្រើប្រាស់កម្មវិធី AI របស់ខ្លួនដើម្បីបង្កើតខ្លឹមសារភេរវករក្លែងក្លាយក្នុងរយៈពេលជិតមួយឆ្នាំ។ លើសពីនេះ ក្រុមហ៊ុនបានបង្ហាញរបាយការណ៍អ្នកប្រើប្រាស់រាប់សិបនាក់ ដោយចោទប្រកាន់ថាកម្មវិធី AI របស់ខ្លួន Gemini ត្រូវបានប្រើដើម្បីបង្កើតសម្ភារៈកេងប្រវ័ញ្ចលើកុមារថែមទៀតផង។​ នេះបើយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃទី០៦ ខែមីនា ឆ្នាំ២០២៥។

ការបង្ហាញនេះ ត្រូវបានធ្វើឡើងក្រោមច្បាប់របស់ប្រទេសអូស្ត្រាលី ដែលតម្រូវឱ្យក្រុមហ៊ុនបច្ចេកវិទ្យារាយការណ៍ជាទៀងទាត់អំពីកិច្ចខិតខំប្រឹងប្រែងកាត់បន្ថយគ្រោះថ្នាក់របស់ពួកគេ ឬប្រឈមនឹងការផាកពិន័យដែលអាចកើតមាន។ របាយការណ៍នេះត្រូវបានគេឱ្យដឹងថា គ្របដណ្តប់ពីខែមេសា ឆ្នាំ២០២៣ ដល់ខែកុម្ភៈ ឆ្នាំ២០២៤។ គណៈកម្មការសុវត្ថិភាព eSafety របស់ប្រទេសអូស្ត្រាលីបានពណ៌នាការបង្ហាញរបស់ Google ថាជា «ការយល់ដឹងដំបូងគេលើពិភពលោក» អំពីរបៀបដែលអ្នកប្រើប្រាស់ទាញយកបច្ចេកវិទ្យា AI ដើម្បីបង្កើតមាតិកាដែលបង្កគ្រោះថ្នាក់។

ស្នងការ eSafety លោកស្រី Julie Inman Grant បាននិយាយនៅក្នុងសេចក្តីថ្លែងការណ៍មួយថា​ «នេះគូសបញ្ជាក់ថា តើវាមានសារៈសំខាន់យ៉ាងណាសម្រាប់ក្រុមហ៊ុនដែលបង្កើតផលិតផល AI ដើម្បីការប្រុងប្រយ័ត្នឱ្យបានខ្ពស់ចំពោះករណីនេះ»។ នៅក្នុងរបាយការណ៍នេះ Google បានបង្ហាញថា ខ្លួនបានទទួលរបាយការណ៍អ្នកប្រើប្រាស់ចំនួន ២៥៨នាក់អំពីការសង្ស័យថាជាភេរវករក្លែងក្លាយដែលបង្កើតដោយ AI និងរបាយការណ៍អ្នកប្រើប្រាស់ចំនួន ៨៦នាក់ផ្សេងទៀតបានចោទប្រកាន់ការកេងប្រវ័ញ្ចកុមារ ឬការរំលោភបំពានដែលបង្កើតដោយ AI។

គួរជម្រាបថា អ្នកនាំពាក្យរបស់ Google បាននិយាយថា ខ្លួននឹងមិនអនុញ្ញាតឱ្យបង្កើត ឬចែកចាយខ្លឹមសារដែលទាក់ទងនឹងការសម្របសម្រួលអំពើជ្រុលនិយមដោយហិង្សា ឬភេរវកម្ម ការកេងប្រវ័ញ្ចលើកុមារ ការរំលោភបំពាន ឬសកម្មភាពខុសច្បាប់ផ្សេងទៀតឡើយ។ អ្នកនាំពាក្យរូបនេះ បានបន្ថែមទៀតថា «យើងប្តេជ្ញាពង្រីកកិច្ចខិតខំប្រឹងប្រែងរបស់យើង ដើម្បីជួយរក្សាសុវត្ថិភាពប្រជាជនអូស្ត្រាលីតាមអ៊ីនធឺណិត»៕