(បរទេស)៖ Apple ត្រូវបានគេមើលឃើញថា បានចាប់ផ្ដើមអភិវឌ្ឍន៍នូវផលិតផលរបស់ខ្លួនដោយរួមបញ្ចូលនូវមុខងារ AI ខណៈ​ដែល​មាន​មតិមួយចំនួនបានលើកឡើងថា វាហាក់ដូចជាយឺតពេលបន្តិចសម្រាប់ Apple ក្នុងការចូលប្រឡូកនៅក្នុងពិភព AI ប៉ុន្តែសម្រាប់​អ្នក​ជំនាញ​បានយល់ឃើញថា Apple គឺមិនយឺតពេលនោះទេ ព្រោះ Apple តែងតែមានចក្ខុវិស័យវែងឆ្ងាយ និងខុសប្លែកពីគេ ជាពិសេសគឺការ​អភិវឌ្ឍន៍នូវផលិតផលរបស់ខ្លួន។

ថ្មីៗនេះយោងតាមការបញ្ជាក់ពីសំណាក់អ្នកវិភាគដ៏ល្បីរបស់ Bloomberg គឺលោក Mark Gurman បានឱ្យដឹងថា ក្រុមហ៊ុន Apple កំពុងសិក្សា និងស្វែងរកគំនិតថ្មីសម្រាប់ការបន្ថែម ឬបញ្ចូលមុខងារកាមេរ៉ាចូលទៅកាន់នាឡិកាដៃឆ្លាតវៃរបស់ខ្លួនគឺ Apple Watch ដើម្បី​ពង្រីកវិសាលភាពរបស់វាឱ្យកាន់តែអស្ចារ្យជាងមុខ។

ទាំង Apple Watch និង Watch Ultra ត្រូវបានគេរំពឹងថានឹងទទួលបានមុខងារកាមេរ៉ា ដោយម៉ូដែលធម្មតានឹងមាននៅលើ​អេក្រង់ ខណៈម៉ូដែល Ultra នឹងមានប៊ូតុងនៅចំហៀង។ លោក Gurman បញ្ជាក់​ថា Apple Watches ដែល​បំពាក់​កាមេរ៉ា​អាច​នឹង​ចេញ​នៅ​ឆ្នាំ ២០២៧។

យោងតាមប្រភពមួយចំនួនផ្សេងទៀតបានបង្ហើបឱ្យដឹងផងដែរថា Apple មិនត្រឹមតែបំពាក់កាមេរ៉ានៅលើ Apple Watch ប៉ុណ្ណោះទេ ថែមកំពុងសាកល្បងបំពាក់នៅលើឧបករណ៍ AirPods ជាលក្ខណៈ built-in camera តែម្ដង។

បច្ចុប្បន្នមានក្រុមហ៊ុនបច្ចេកវិទ្យាជាច្រើនបានធ្វើអន្តរកម្មទៅលើផលិតផលរបស់ខ្លួនដោយអាចធ្វើការភ្ជាប់ទំនាក់ទំំនងរវាងអ្នកប្រើប្រាស់ និងឧបករណ៍ប្រើប្រាស់រាល់ថ្ងៃ ជាពិសេសគឺបានប្រើនូវបច្ចេកវិទ្យា AI ហើយអ្វីដែលអ្នកប្រើប្រាស់ត្រូវការប្រើ និងប្រើច្រើនជាងគេបំផុត​នោះគឺទូរសព្ទ និង​នាឡិកាដៃឆ្លាតវៃ ដូច្នេះ Apple មើលឃើញពីចំណុចនេះទើបបានសិក្សាស្វែងរកវិធីសាស្ត្រដើម្បីឱ្យអ្នកប្រើប្រាស់កាន់តែ​ងាយស្រួល និងជិតស្និទ្ធ។

សម្រាប់ Apple ផ្ទាល់គឺបានប្រើប្រាស់នូវមុខងារ AI របស់ខ្លួនសម្រាប់ភ្ជាប់ទំនាក់ទំនងទៅលើស៊េរី iPhone 16 ដែលដំណើរការដោយ​​ iOS 18.2 ឬជំនាន់ថ្មីៗចុងក្រោយ៕

https://www.gsmarena.com/gurman_apple_is_exploring_apple_watches_with_cameras-news-67074.php