(ម៉ូនិច)៖ ក្រុមជើងឯកលីគកំពូលអាល្លឺម៉ង់ Bundesliga រដូវកាលមុនគឺ Bayer Leverkusen បានជ្រុះចេញពីពានរង្វាន់លំដាប់ទី២ German Cup 2024-25 នៃវគ្គ ៤ក្រុមចុងក្រោយ ក្រោយចាញ់ម្ចាស់ផ្ទះ Arminia Bielefeld ២-១ យប់មិញនេះ ដែលជាក្រុមមកពីក្របខណ្ឌលីគទី៣។

នេះមានន័យថា ម្ចាស់ការពារជើងឯក Leverkusen ដែលលេង ៣៤ប្រកួតក្នុងលីគមិនចាញ់សោះរដូវកាលមុន បានក្លាយជាក្រុមទី៤ លេងនៅ Bundesliga ដែល Bielefeld បានទម្លាក់ចេញពី German Cup មុនពេលឆ្លងចូលផ្តាច់ព្រ័ត្រ។

ពួកគេបានធ្វើការវាយបកដ៏អស្ចារ្យ បន្ទាប់ពីកីឡាករ Jonathan Tah ធ្វើបានគ្រាប់នាំមុខសម្រាប់ក្រុមភ្ញៀវ Leverkusen តាំងពីនាទី១៧ មក នៅពេល Marius Worl បានស៊ុតទម្លុះសំណាញ់ទីរបស់ Lukas Hrasdecky និងគ្រាប់ជ័យជម្នះនៅនាទី៤៥+៣ ដោយមិត្តរួមក្រុម Grober ដើម្បីទម្លាក់ក្រុមរបស់លោក Xabi Alonso ត្រឹមវគ្គ ៤ក្រុមនេះតែម្តង។

គួររំលឹកផងថា Bielefeld បានឡើងទៅលេងនៅ Bundesliga កាលឆ្នាំ២០២០ ក្រោយរង់ចាំអស់ ១១ឆ្នាំ មុនពេល ២រដូវកាលបន្ទាប់បានធ្លាក់មកវិញ ហើយក្នុងឆ្នាំ២០២៣ ពួកគេបន្តធ្លាក់ទៅលេងក្នុងក្របខណ្ឌទី៣ ទៀត ក្រោយពេលធ្លាក់នៃវគ្គជម្រុះ។ Bielefeld ត្រូវរង់ចាំរវាងក្រុមឈ្នះ Stuttgart ឬក៏ RB Leipzig ដើម្បីលេងដណ្តើមពាន German Cup ដែលត្រូវប្រកួតគ្នានារាត្រីថ្ងៃពុធនេះ បញ្ចប់វគ្គពាក់កណ្តាលផ្តាច់ព្រ័ត្រ៕