(ភ្នំពេញ)៖ សមាជិកគណៈកម្មាធិការប្រតិបត្តិសហព័ន្ធកីឡាទ្រីយ៉ាត្លុងកម្ពុជា ក៏ដូចជាមន្ដ្រី និងកីឡាករ-កីឡាការិនីស្ទើរគ្រប់ប្រភេទកីឡា បានសម្ដែងការសោកស្ដាយជាខ្លាំង ចំពោះការបាត់បង់អ្នកស្រី សូ រ៉ាន់ដេត ដែលបានទទួលមរណភាពនាយប់ថ្ងៃទី០១ ខែមេសា ឆ្នាំ២០២៥ ក្នុងវ័យ ៥៣ឆ្នាំ ដោយរោគាពាធ។

អ្នកស្រី សូ រ៉ាន់ដេត បានចាប់ផ្ដើមជំនាញកីឡា ដោយការសិក្សានៅវិទ្យាស្ថានជាតិអប់រំកាយ និងកីឡា មុនចូលបម្រើការងារនៅនាយកដ្ឋានអប់រំកាយ និងកីឡាសិស្ស-និស្សិត នៃក្រសួងអប់រំ យុវជន និងកីឡា មកទល់បច្ចុប្បន្ន។ លើសពីនេះ អ្នកស្រីក៏ជាអនុប្រធាននាយកដ្ឋានគ្រប់គ្រងកីឡាជំនាញ នៃគណៈកម្មាធិការជាតិអូឡាំពិកកម្ពុជា (NOCC) ហើយក៏ជាសមាជិកគណៈកម្មាធិការប្រតិបត្តិសហព័ន្ធកីឡាទ្រីយ៉ាត្លុង និងជាគ្រូបង្វឹកក្រុមជម្រើសជាតិកីឡាទ្រីយ៉ាត្លុងកម្ពុជាផងដែរ។

លោក ងិន សុបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា បានសម្ដែងនូវការសោកស្ដាយជាខ្លាំង ក្រោយទទួលដំណឹងមរណភាពរបស់អ្នកស្រី សូ រ៉ាន់ដេត នៅយប់ថ្ងៃទី០១ ខែមេសា ឆ្នាំ២០២៥។ ក្នុងនាមសហព័ន្ធ និងកីឡាករ-កីឡាការិនី លោកបានចាត់ទុកការបាត់បង់អ្នកស្រី គឺជាការបាត់បង់នូវធនធាន និងមន្ដ្រីបច្ចេកទេសដ៏សំខាន់ក្នុងវិស័យកីឡាជាតិ ពិសេសកីឡាទ្រីយ៉ាត្លុង ដ្បិតអ្នកស្រី គឺជាផ្នែកមួយនៃការចាប់ផ្ដើមកកើតសហព័ន្ធ និងបានរួមចំណែកជំរុញការអភិវឌ្ឍ តាំងពីកវែងកឆ្នាំង រហូតបង្កើតបាននូវស្នាដៃជាច្រើន។ ចុងក្រោយលោក ក៏សូមឧទ្ទិសបួងសួងដល់វិញ្ញាណក្ខន្ធរបស់អ្នកស្រី សូ រ៉ាន់ដេត សូមបានទៅកាន់សុគតិភព កុំបីឃ្លៀងឃ្លាតទ្បើយ៕