(មេនឆេស្ទើ)៖ Erling Haaland ខ្សែប្រយុទ្ធជួរមុខក្លិបមេឃខៀវ Manchester City នឹងត្រូវសម្រាកព្យាបាលរបួសកជើងមានរយៈពេលចាប់ពី ៧សប្តាហ៍ឡើងទៅ ពោលគឺនៅជិតចុងបញ្ចប់រដូវកាលឆ្នាំ២០២៤-២៥ នេះតែម្តង។ នេះបើតាមការបញ្ជាក់ពីគ្រូបង្វឹក លោក Pep Guardiola។

កីឡាករអន្តរជាតិន័រវេស វ័យ ២៤ឆ្នាំរូបនេះ ត្រូវបានបង្ខំចិត្តប្តូរចេញភ្លាមៗផងដែរនៅនាទី៦១ ក្រោយពេលជួបបញ្ហារបួសជង្គង់ជាទម្ងន់នេះ ក្នុងប្រកួត FA Cup នាសប្តាហ៍មុនទល់នឹង AFC Bournemouth ដែលពួកគេបានយកឈ្នះ ២-១ ដើម្បីឡើងវគ្គ ៤ក្រុមចុងក្រោយផងដែរ។

លោក Pep បានថ្លែងថា «ក្រុមវេជ្ជបណ្ឌិតបានប្រាប់ខ្ញុំថា Haaland នឹងត្រូវអវត្តមានយ៉ាងហោចណាស់ចាប់ពី ៥-៧សប្តាហ៍ឯណោះ។ ខ្ញុំសង្ឃឹមថា រូបគេនឹងជាសះស្បើយទាន់ពេលនាចុងរដូវកាល និងអាចលេងបាននៅ Club World Cup។ បញ្ហាកីឡាកររបួស វាស្ទើរតែកើតឡើងជារៀងរាល់ឆ្នាំ ជៀសមិនផុតឡើយ»។

កូនក្រុមរបស់បុរសសញ្ជាតិអេស្ប៉ាញរូបនេះ បានជួបបញ្ហារបួសជាច្រើនរដូវកាលនេះ និងមានសុទ្ធតែកីឡាករសំខាន់ៗទៀតផង ដែលធ្វើឱ្យ City ម្ចាស់ជើងឯក Premier League កំពុងឈរនៅលេខ៥ បណ្តោះអាសន្នក្នុងលីគ ដាច់ ១ពិន្ទុពីតោខៀវ Chelsea ក្នុងតំបន់កៅអីស្វ័យប្រវត្តិលេងពានអឺរ៉ុប UEFA Champions League រដូវកាលក្រោយ៕