(ឡុងដ៍)៖ សហព័ន្ធគ្រប់គ្រងបាល់ទាត់ប្រចាំទ្វីបអឺរ៉ុប ហៅកាត់ UEFA បានប្រកាសពីការវាយតម្លៃ ចំពោះគណនីហិរញ្ញវត្ថុរបស់ក្លិបតោខៀវ Chelsea នៅក្រោយពេលបញ្ចប់រដូវកាលឆ្នាំ២០២៤-២៥ នេះ។

ពីគេហទំព័រកីឡា BBC បានចេញផ្សាយនៅថ្ងៃពុធ ទី០២ ខែមេសា ឆ្នាំ២០២៥ នេះថា UEFA បានត្រៀមបើកបេសកកម្មពិសេសទៅលើក្លិបអង់គ្លេស Chelsea អំពីចំណូល-ចំណាយចុងក្រោយ បន្ទាប់ពីពួកគេបានលក់ក្រុមនារី (women’s team) ទៅឱ្យក្រុមហ៊ុមមេរួចមក។

កាលពីថ្ងៃចន្ទដើមសប្តាហ៍នេះ Chelsea ត្រូវបានគេរាយការណ៍ថា ទទួលបានចំណូលមិនទាន់បង់ពន្ធ (pre-tax) ប្រមាណ ១២៨.៤លានផោន គិតត្រឹមបិទរដូវកាលមុន នាខែមិថុនា ឆ្នាំ២០២៤ ដែលជាលទ្ធផលវិជ្ជមានផ្នែកហិរញ្ញវត្ថុលើកដំបូងរបស់ពួកគេ ស្ថិតក្រោមការគ្រប់គ្រងដោយម្ចាស់ថ្មី គឺលោក Todd Boehly។

ចំណូលទាំងនោះ ក៏បានមកពីភាពជោគជ័យនៃក្រុមនារី ដែលធ្វើពាណិជ្ជកម្មដាច់ដោយឡែកពីគ្នាពីក្រុមបុរស និងចំណូលមួយផ្នែកទៀត បានមកពីការលក់សណ្ឋាគារ ២កន្លែងទៅឱ្យក្រុមហ៊ុនបុត្រសម្ព័ន្ធទៀតផង ដើម្បីគេចចេញពីគោលការណ៍ច្បាប់ហិរញ្ញវត្ថុនៃ Premier League (PSR)។

ក្រុមតោខៀវមួយនេះ ក៏បានដោះស្រាយរួចរាល់ផងដែរ ជុំវិញបញ្ហាជាមួយ PSR នាអំឡុងខែមករា ឆ្នាំ២០២៥ ក្នុងចំណោមក្លិប ១៩ផ្សេងទៀតក៏បានធ្វើដែរ។

ជាការកត់សម្គាល់ សហកម្មសិទ្ធិលោក Todd Boehly និងលោក Behdad Eghball បានចំណាយលុយចំនួន ២.៥ពាន់លានផោន ដើម្បីទិញ Chelsea កាលឆ្នាំ២០២២ និងគិតមកទល់ពេលនេះ ពួកគេបានចំណាយអស់ ១.៥ពាន់លានផោនហើយទៅលើកីឡាករ៕