(បរទេស)៖ ប្រធានជាន់ខ្ពស់ផ្នែកស្រាវជ្រាវបញ្ញាសិ្បនិម្មិត AI របស់ Meta Platform លោកស្រី Joelle Pineau បានប្រកាសចាកចេញពីក្រុមហ៊ុន ស្របពេលដែលក្រុមហ៊ុនបច្ចេកវិទ្យាយក្សមួយនេះកំពុងវិនិយោគយ៉ាងខ្លាំងក្លា និងប្រកួតប្រជែងក្នុងលំហ AI។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០២ ខែមេសា​ ឆ្នាំ២០២៥។

លោកស្រី Pineau ត្រូវបានគេឱ្យដឹងថា គឺជាបុគ្គលិកជើងចាស់ដ៏ឆ្នើមមួយរូបនៅក្នុងក្រុមហ៊ុនមេរបស់ Facebook និងបានបម្រើការងារនៅទីនោះអស់រយៈពេល ៨ឆ្នាំមកហើយ ហើយបានដឹកនាំក្រុមស្រាវជ្រាវបញ្ញាសិប្បនិម្មិត Fundamental AI Research (FAIR) ក្នុងអំឡុងឆ្នាំ២០២៣។ តែយ៉ាងណា បើយោងតាមការបង្ហោះនៅលើ LinkedIn នៅថ្ងៃអង្គារសប្តាហ៍នេះ Pineau បានសរសេរថានាងនឹងចាកចេញនៅថ្ងៃទី៣០ ខែឧសភាខាង ក្នុងពេលដ៏ខ្លីខាងមុខនេះ។ ជាច្រើនឆ្នាំមកនេះ នាងបានធ្វើការលើគម្រោងដែលឥឡូវនេះកំពុងត្រូវបានប្រើប្រាស់ដោយក្រុមរាប់សិបនាក់ដើម្បីផលិតផលិតផល រួមមាន PyTorch, FAISS, Roberta, Dino, Llama, SAM, Codegen និង Audiobox រួមទាំងក្រុមមជាច្រើនទៀត។

លោកស្រី Pineau បានសរសេរនៅក្នុងសារបង្ហោះបន្ថែមទៀតថា «ថ្ងៃនេះ នៅពេលដែលពិភពលោកឆ្លងកាត់ការផ្លាស់ប្តូរដ៏សំខាន់ នៅពេលដែលការប្រកួតប្រជែងសម្រាប់ AI កើនឡើង ហើយនៅពេលដែល Meta រៀបចំសម្រាប់ជំពូកបន្ទាប់ វាជាពេលវេលាដើម្បីបង្កើតកន្លែងសម្រាប់អ្នកដទៃដើម្បីបន្តការងារ» ដែលជាហេតុផលសម្រាប់ការដើរចេញដើម្បីអនុញ្ញាតឱ្យអ្នកដទៃបន្តការងារនេះ។

គួរជម្រាបថា កាលពីឆ្នាំមុន Meta បានរៀបចំរចនាសម្ព័ន្ធផ្នែកបញ្ញាសិប្បនិម្មិត្តរបស់ខ្លួនឡើងវិញ ដើម្បីបង្រួបបង្រួមផលប័ត្រស្រាវជ្រាវ AI របស់ខ្លួន រួមបញ្ចូល AI កម្រិតខ្ពស់ទៅក្នុងផលិតផល និងសេវាកម្មរបស់ខ្លួន និងសម្រួលដល់ការអភិវឌ្ឍន៍នៃបច្ចេកវិទ្យាថ្មីៗ៕