(ភ្នំពេញ)៖ នាពេលថ្មីៗនេះ ផ្សារទំនើប ជីប ម៉ុង ២៧១ មេហ្គា ម៉ល បានសហការជាមួយ នាយកដ្ឋានសិល្បៈទស្សនីយភាពនៃក្រសួងវប្បធម៌ និងវិចិត្រសិល្បៈ នាំយកសិល្បៈល្ខោនដែលសឹងតែបាត់មុខគឺ ល្ខោនបាមោជ្ជទ័យរឿង «កុលាបប៉ៃលិន» មកសម្តែងជាលើកទីពីរ សម្រាប់ទស្សនាដោយសេរី ទទួលបានការគាំទ្រដ៏ច្រើនលើសលុបពីសំណាក់មហាជន។

គួរចាំថាកាលពីខែធ្នូ ឆ្នាំ២០២៤ កន្លងទៅ ក្រុមហ៊ុន ជីប ម៉ុង រីថែល ឯ.ក បានចុះអនុស្សរណៈនៃការយោគយល់គ្នាជាមួយ ក្រសួងវប្បធម៌ និងវិចិត្រសិល្បៈ ស្តីពីកិច្ចសហការលើវិស័យវប្បធម៌ និងសិល្បៈ ឧបត្ថម្ភទឹកប្រាក់រហូតដល់ ២៥ម៉ឺនដុល្លារ ក្នុងគោលបំណងលើកស្ទួយ និងគាស់រំលើងវប្បធម៌ និងសិល្បៈជាកេរដំណែលដូនតា ឱ្យកាន់តែកៀកនិងទូលំទូលាយដល់ប្រជាពលរដ្ឋកម្ពុជាក្នុងរយៈពេល៥ឆ្នាំ រាប់ពីឆ្នាំ ២០២៥-២០៣០។

បន្ទាប់ការចុះអនុស្សរណៈនៃការយោគយល់គ្នាហើយ ផ្សារទំនើប ជីប ម៉ុង តែងតែនាំយកសិល្បៈវប្បធម៌ បុរាណមកសម្តែងជូនទស្សនិកជកគ្រប់បានស្គាល់ និងទស្សនា។ ថ្មីៗនេះផងដែរបន្ទាប់ពីទទួលបានការជោគជ័យ និងគាំទ្រពីការសម្តែងលើកទីមួយ ផ្សារទំនើប ជីប ម៉ុង ២៧១ មេហ្គា ម៉ល បាននាំយកល្ខោនបាមោជ្ជទ័យរឿង «កុលាបប៉ៃលិន» មកសម្តែងជាលើកទីពីរផ្ទុះការគាំទ្រច្រើនសន្ធឹក ផ្តល់ជូននូវភាពសប្បាយរីករាយដល់ទស្សនិកជនមកពីគ្រប់មជ្ឍដ្ឋាន និងគ្រប់វ័យ។

នារាត្រីដ៏ពិសេសនោះក៏មានវត្តមានដ៏ខ្ពង់ខ្ពស់ពីលោកស្រី ឡងឌី សាន់ណារ៉ា រដ្ឋលេខាធិការ ក្រសួងវប្បធម៌ និងវិចិត្រសិល្បៈ លោកអ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង លោកជំទាវ តែ សុវណ្ណី អគ្គនាយិកាពហុពាណិជ្ជកម្ម និង លោកស្រី​ លី សុខឆេង អគ្គនាយិកាក្រុមហ៊ុន ជីប ម៉ុង រីថែល បានចូលរួមទស្សនាផងដែរ។ លើសពីនេះទៅទៀត លោកអ្នកឧកញ៉ា ភាព ហៀក បានធ្វើការឧបត្ថម្ភថវិកា ១០លានរៀល បន្ថែមទៀតជូនទៅសិល្បករ សិល្បការិនី នៃនាយកដ្ឋានសិល្បៈទស្សនីយភាព របស់ក្រសួងវប្បធម៌ និងវិចិត្រសិល្បៈដើម្បីជាការលើកទឹកចិត្តផងដែរ។

នាឱកាសចូលឆ្នាំថ្មីប្រពៃណីខ្មែរខាងមុខនេះ ផ្សារទំនើប ជីប ម៉ុង ២៧១ មេហ្គា ម៉ល ក៏មាននាំយកនូវសិល្បៈទស្សនីយភាពបុរាណជាច្រើនទម្រង់ផ្សេងទៀតដូចជា ល្ខោនខោល ល្ខោនអាប៉េ របាំប្រពៃណី និងរបាំបុរាណ ជូនពុកម៉ែ បងប្អូនទស្សនាកម្សាន្តដោយសេរីបន្ថែមទៀត។ នេះគឺជាឆន្ទៈដ៏មុះមុតរបស់ ផ្សារទំនើបខ្នាតអន្តរជាតិរបស់កូនខ្មែរ ជីប ម៉ុង រីថែល អោយក្លាយជាគោលដៅផ្សព្វផ្សាយសិល្បៈ និងវប្បធម៌ខ្មែរ ដោយបានរៀបចំព្រឹត្តិការណ៍វប្បធម៌ និងទស្សនីយភាពការសម្តែងសិល្បៈគ្រប់ទម្រង់ ជួយអភិរក្ស អភិវឌ្ឍ ព្រមទាំងពង្រីកចំណេះដឹង និងផ្សព្វផ្សាយអត្តសញ្ញាណជាតិទៅកាន់សង្គមជាតិ តាមរយៈសកម្មភាពសិល្បៈ ព្រឹត្តិការណ៍ និងមហោស្រពជាច្រើនទៀតនាពេលអនាគតរបស់ក្រុមហ៊ុន ជីប ម៉ុង រីថែល។
ក្រុមហ៊ុន ជីប ម៉ុង រីថែល បានប្តេជ្ញាចិត្តបន្តចូលរួមយ៉ាងពេញទំហឹងក្នុងការលើកស្ទួយ អភិរក្ស និងអភិវឌ្ឍសិល្បៈ និងវប្បធម៌ខ្មែរឱ្យកាន់តែទូលំទូលាយ ហើយការផ្សព្វផ្សាយនេះធ្វើទៅបានជោគជ័យត្រូវការចូលរួមគាំទ្រពីប្រជាពលរដ្ឋគ្រប់រូបផងដែរ។

ព័ត៌មានបន្ថែម លោកអ្នកអាចតាមដានផេកផ្លូវការរបស់ផ្សារទំនើប ជីប ម៉ុង ២៧១ មេហ្គា ម៉ល (Chip Mong 271 Mega Mall) ឬទំនាក់ទំនងទៅកាន់លេខទូរស័ព្ទ ០៨៧ ៧១១ ៨១១ និង ០៩០ ៧១១ ៨១១។ សម្រាប់ទំនាក់ទំនងជួលទីតាំងលក់ ០៩០ ៥៥៨ ៨២២ និង ០៦៧ ២២២ ៧៨៤​៕