(បរទេស)៖ ថ្មីៗនេះក្រុមហ៊ុនបច្ចេកវិទ្យាយក្សអាមេរិក Qualcomm និងក្រុមហ៊ុនជប៉ុន​ Arm ត្រូវបានគេរាយការណ៍មកថា កំពុងពិចារណាទិញយកក្រុមហ៊ុន Alphawave ដែលមានមូលដ្ឋាននៅចក្រភពអង់គ្លេស ដើម្បីទទួលបានសិទ្ធិប្រើប្រាស់បច្ចេកវិទ្យា serializer-deserializer (SerDes) សម្រាប់បង្កើតប្រព័ន្ធដំណើរការបញ្ញាសិប្បនិម្មិត្ត AI ផ្ទាល់ខ្លួន។ បន្ទាប់ពីប្រកាសនេះ បានធ្វើឱ្យភាគហ៊ុនរបស់ Alphawave កើនឡើងជាគំហុកដល់ទៅជាង ៥២% ឯណោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០២ ខែមេសា ឆ្នាំ២០២៥។

Alphawave គឺជាក្រុមហ៊ុនដ៏ធំរបស់ចក្រភពអង់គ្លេសដែលផ្តល់សេវាកម្ម ឌីហ្សាញ និងផ្តល់អាជ្ញាប័ណ្ណបច្ចេកវិទ្យាផលិតផលពាក់កណ្តាលសម្រេច semiconductor សម្រាប់មជ្ឈមណ្ឌលទិន្នន័យ បណ្តាញ និងការផ្ទុកទិន្នន័យ។ បច្ចេកវិទ្យា SerDes ដើរតួនាទីជាមូលដ្ឋានក្នុងការអភិវឌ្ឍន៍ AI ដែលអនុញ្ញាតឱ្យផ្ទេរទិន្នន័យល្បឿនលឿនរវាងបន្ទះឈីប និងបម្រើជាឆ្អឹងខ្នងសម្រាប់អាជីវកម្មបន្ទះឈីបតាមតម្រូវការរបស់ក្រុមហ៊ុនដូចជា Broadcom និង Marvell Technology។ លើសពីនេះ វាគាំទ្រអត្រាទិន្នន័យច្រើនជីហ្គាបៃដែលចាំបាច់សម្រាប់មជ្ឈមណ្ឌលទិន្នន័យ AI, HPC និង hyperscale ជាដើម។

តែយ៉ាងណា ជុំវិញកិច្ចព្រមព្រៀងលម្អិតទាំង Qualcomm និង Arm នៅមិនទាន់មានការឆ្លើយតបនឹងសំណើរសុំការអត្ថាធិប្បាយពី Reuters នោះ។ ខណៈក្រុមហ៊ុនទាំងពីរនេះ មានគោលបំណងទិញយកដាច់ដោយឡែក មិនមានជាប់ទាក់ទងជាដៃគូសហការនោះទេ។

គួរជម្រាបថា ក្រោយដំណឹងទិញយកនេះភាគហ៊ុនរបស់ Alphawave បានកើនឡើងជាងពាក់កណ្តាលឈានដល់តម្លៃខ្ពស់បំផុត ៧០៨.២ លានផោន (ប្រហែល ៩១៣.១ លានដុល្លារ)៕