(លីវើភូល)៖ ហង្សក្រហម Liverpool កាន់តែប្រកៀក ក្នុងការគ្រងតំណែងជើងឯកលីគកំពូលអង់គ្លេស Premier League មែនទែនហើយ បន្ទាប់ពីយកឈ្នះគូប្រជែង ស្ករគ្រាប់ Everton ១ទល់នឹង០ នាយប់មិញនេះ ប្រចាំសប្តាហ៍ទី៣០ ជើងទី២។

នេះមានន័យថា ក្រុមដែលដឹកនាំដោយបុរសសញ្ជាតិហូឡង់ លោក Arne Slot ត្រូវការតែ ១៣ពិន្ទុទៀតប៉ុណ្ណោះ ក្នុងចំណោម ៨ប្រកួតដែលនៅសល់ ស្របពេលមាន ៧៣ពិន្ទុនាំមុខដាច់កំពូលតារាងពីក្រុមលេខ២ កាំភ្លើងធំ Arsenal ដោយមានតែ ៦១ពិន្ទុ។

Premier League ជាពានតែមួយគត់ ដែលហង្សក្រហមរំពឹងឈ្នះនារដូវកាលឆ្នាំ២០២៤-២៥ នេះ សម្រាប់រដូវកាលទី១ របស់លោក Slot និងគម្រប់លើកទី២០ របស់ពួកគេផងដែរ បន្ទាប់ពីឈ្នះចុងក្រោយកាលឆ្នាំ២០២០ ស្ថិតក្រោមការដឹកនាំរបស់លោក Jurgen Klopp។

ខ្សែប្រយុទ្ធអន្តរជាតិព័រទុយហ្គាល់ Diogo Jota ជាអ្នករកបានគ្រាប់ជ័យជម្នះនៅនាទី៥៧ ពីការបញ្ជូនរបស់ Luis Diaz នៅក្នុងកីឡដ្ឋាន Anfield និងជាគ្រាប់ទី៦ ក្នុងលីគនារដូវកាលរបស់គេដែរ៕