(ម៉ាឌ្រីដ)៖ FC Barcelona ត្រូវប្រឈមមុខនឹង Real Madrid ក្នុងជំនួប El Clasico លើកទី៨ នៅវគ្គផ្តាច់ព្រ័ត្រពានលំដាប់ទី២ អេស្ប៉ាញ Copa del Rey 2024-25 ក្រោយលេងមិនចាញ់ Atletico Madrid។

ក្រុមអ្នកមានបុណ្យ Barcelona ដែលដឹកនាំដោយគ្រូបង្វឹកអាល្លឺម៉ង់ Hansi Flick ក្នុងរដូវកាលទី១ របស់លោកផងនោះ បានបន្តយកឈ្នះម្ចាស់ផ្ទះ Atletico ១ទល់នឹង០ ដើម្បីបញ្ចប់ជើងទី២ នៃវគ្គពាក់កណ្តាលផ្តាច់ព្រ័ត្រ Copa del Rey ក្រោយពេលជើងទី១ នៅទីក្រុង Barcelona បញ្ចប់ក្នុងលទ្ធផលស្មើគ្នា ៤-៤។

អតីតកីឡករ Manchester City គឺ Ferran Torres ជាអ្នករកបានគ្រាប់ជ័យជម្នះនៅនាទី២៧ ដែលជាការបញ្ជូនរបស់មិត្តរួមក្រុម Lamine Yamal នៅកីឡដ្ឋាន Metropolitano នៅពីមុខអ្នកទស្សនាផ្ទាល់ប្រមាណជិត ៧ម៉ឺននាក់។

ខ្សែប្រយុទ្ធអន្តរជាតិអេស្ប៉ាញរូបនេះ រកបាន ៥គ្រាប់ហើយ ក្នុងចំណោម ៤ប្រកួតចុងគ្រប់កម្មវិធីជាមួយ Barcelona ក្នុងការរួមចំណែកជួយក្រុមអ្នកមានបុណ្យ ឈ្នះពាន៣ រដូវកាលនេះផងដែរ។

Barcelona ដែលលេងមិនទាន់ចាញ់ក្នុងលីគ La Liga រដូវកាលនេះ ជាមួយនឹងការនាំមុខកំពូលតារាង ៣ពិន្ទុផងនោះ ពីក្រុមការពារតំណែងជើងឯក Real Madrid នឹងត្រូវលេងផ្តាច់ព្រ័ត្រនាថ្ងៃទី២៦ ខែមេសា ឆ្នាំ២០២៥ ស្ថិតក្នុងទីក្រុង Seville ប្រទេសអេស្ប៉ាញ៕