(ម៉ាឌ្រីដ)៖ បុរសសញ្ជាតិអ៉ីតាលី លោក Carlo Ancelotti អ្នកចាត់ការទូទៅក្លិប Real Madrid បានធ្វើសក្ខីកម្មនៅតុលាការ ជុំវិញការចោទប្រកាន់ពីបទបន្លំពន្ធនាពេលកន្លងមកនៅក្នុងប្រទេសអេស្ប៉ាញ។

ពីគេហទំព័រកីឡា BBC បានចេញផ្សាយថា អតីតគ្រូបង្វឹកក្លិប Chelsea និង Everton រូបនេះត្រូវបានចោទប្រកាន់ពីបទគេចវេសមិនព្រមបង់ពន្ធជូនរដ្ឋនូវចំនួនទឹកប្រាក់ប្រមាណ ១លានអឺរ៉ូពីប្រាក់ខែរបស់លោក នាអំឡុងដឹកនាំ Real Madrid លើកដំបូងនៅចន្លោះឆ្នាំ២០១៣ ដល់ឆ្នាំ២០១៥។

តែយ៉ាងណា លោក Ancelotti ដែលត្រូវបានតែងតាំងដឹកនាំអធិរាជសមួយនេះជាលើកទី២ ទៀតកាលឆ្នាំ២០២១ មកនោះបាននិយាយថា «រូបលោមិនដែលគិតសោះឡើយ ពីការគេចវេសបង់ពន្ធជូនរដ្ឋអេស្ប៉ាញ» នៅអំឡុងពេលធ្វើសក្ខីកម្មកាលពីថ្ងៃទី០២ ខែមេសា ឆ្នាំ២០២៥។

លោកថា «សម្រាប់ខ្ញុំ គ្រប់យ៉ាងគឺធ្វើទៅតាមច្បាប់ជានិច្ច»។

ទាក់ទិននឹងករណីនេះដែរ រដ្ឋអាជ្ញាអេស្ប៉ាញបានកំពុងប្រមែប្រមូល និងស៊ើបអង្កេត នៅពេលលោក Ancelotti ប្រឈមទៅនឹងការជាប់ពន្ធនាគារ ៤ឆ្នាំ និង ៩ខែ រួមទាំងប្រាក់ពិន័យចំនួន ៣.២លានអឺរ៉ូថែមទៀតផង ប្រសិនបើរកឃើញថា គេចវេសមិនបង់ពន្ធលើប្រាក់ខែ និងចំណូលដែលបានមកពីការលក់សិទ្ធិរូបភាពរបស់លោកនោះ៕