(ភ្នពេញ)៖ ពានរង្វាន់សម្ដេចអគ្គមហាសេនាបតីតេជោ ហ៊ុន សែន(Hun Sen Cup) លើកទី១៨ (ថ្នាក់ជាតិ) ឆ្នាំ២០២៤/២៥ បានរកឃើញបេក្ខភាពឡើងវគ្គពាក់កណ្ដាលផ្ដាច់ព្រ័ត្រ(១/២) ៣ក្រុមហើយ ដោយក្រុមវិសាខា បានឡើងទៅជួបភ្នំពេញក្រោន គ្រាដែលក្រុមព្រះខ័នរាជស្វាយរៀង បានឡើងឈរចាំក្រុមឈ្នះ រវាងបឹងកេត និងក្រុម ISI ដង្កោសែនជ័យ ដែលត្រូវប្រកួតកាត់សេចក្ដី ក្នុងវគ្គ ៨ក្រុមចុងក្រោយ ល្ងាចនេះ។

សម្រាប់មបាល់ទាត់ វិសាខា បានឡើងទៅវគ្គពាក់កណ្ដាលផ្ដាច់ព្រ័ត្រ ក្រោយយកឈ្នះសមាគមកីឡាបាល់ទាត់កងយោធពលខេមរភូមិន្ទ ដោយលទ្ធផល ៤-០ ក្នុងជំនួបជើងទី២ នៃវគ្គ ៨ក្រុមចុងក្រោយ កាលពល្ងាចមិញ បន្ទាប់ពីជើងទី១ ក្រុមទាំងពីរ បានត្រឹមស្មើគ្នា ២-២ ។ ជំនួបជើងទី២ ខាងលើ ក្រុមទាំងពីរ បានវាយសម្រុកគ្នាយ៉ាងខ្លាំង តែពុំមានក្រុមណាអាចបំប៉ោងសំណាញ់ទីគ្នាបានឡើយ។

ចូលវគ្គទី២ ក្រុមម្ចាស់ផ្ទះ វិសាខា ក៏រកបាន ៤គ្រាប់ជាបន្ដបន្ទាប់ ក្នុងនោះរកបានដោយ ស៊ិន កក្កដា ៣គ្រាប់ និង Ramon ១គ្រាប់ ដែលជួយឲ្យក្រុមខ្លួន ទទួលបានជ័យជម្នះ ក៏ដូចជាបញ្ចប់ឱកាសក្រុមកងយោធពលខេមរភូមិន្ទ ត្រឹមវគ្គ ១/៤ ផ្ដាច់ព្រ័ត្រ ហើយឡើងទៅជួបក្រុមភ្នំពេញក្រោន នៅវគ្គពាក់កណ្ដាលផ្ដាច់ព្រ័ត្រ បន្ទាប់ពីក្រុមជើងឯករងឆ្នាំចាស់នេះ បានយកឈ្នះណាហ្គាវើលដ៏ ក្នុងវគ្គ ៨ក្រុមចុងក្រោយ កាលពីថ្មីៗកន្លងទៅ។

ដោយឡែកក្រុមការពារតំណែងជើងឯកព្រះខ័នរាជស្វាយរៀង បានឡើងវគ្គពាក់កណ្ដាលផ្ដាច់ព្រ័ត្រ ក្រោយបន្ដយកឈ្នះក្រុមគិរីវង់សុខសែនជ័យ ដោយលទ្ធផល ៣-២ ក្នុងជើងទី២ នៃវគ្គ ៨ក្រុមចុងក្រោយ ។ ជំនួបកាត់សេចក្ដីនៅកីឡដ្ឋានខេត្តស្វាយរៀងនេះ កីឡាករ ឃាន់ សុបិន បានរកគ្រាប់នាំមុខឲ្យគិរីវង់ ១គ្រាប់មុន នៅនាទី៣១ តែត្រូវបានព្រះខ័នរាជស្វាយរៀង វាយបកបាន ៣គ្រាប់វិញ ដោយកីឡាកររ Pablo Augusto មុនកីឡាករ Tenege Veville Mbanwei រកបានគ្រាប់ទី២ ឲ្យគិរីវង់ នៅចុងម៉ោង ។

សរុបលទ្ធផលទាំង ២ជើង ព្រះខ័នរាជស្វាយរៀង គឺបានយកឈ្នះក្រុមគិរីវង់សុខសែនជ័យ ៥-២ ដ្បិតកាលពីជើងទី១ ក្រុមជើងឯកឆ្នាំ២០២៣/២៤ បានយកឈ្នះក្រុមមានមូលដ្ឋាននៅខេត្តតាកែវនេះ ក្នុងលទ្ធផល ២-០ ។ ជ័យជម្នះនេះ នាំឲ្យព្រះខ័នរាជស្វាយរៀង ត្រូវឈរចាំនៅវគ្គពាក់កណ្ដាលផ្ដាច់ព្រ័ត្រ ពោលគឺរង់ចាំក្រុមឈ្នះ រវាងក្រុមបឹងកេត និងក្រុម ISI ដង្កោសែនជ័យ ដែលក្រុមទាំងពីរ នឹងត្រូវជួបគ្នា នាល្ងាចថ្ងៃទី៣ ខែមេសានេះ ក្នុងជំនួបជើងទី២ នៃវគ្គ ៨ក្រុមចុងក្រោយ នៅពហុកីឡដ្ឋានជាតិ បន្ទាប់ពីជើងទី២ បឹងកេត បានយកឈ្នះលើក្រុមដំរីជ័យ ក្នុងលទ្ធផល ២-០៕