(អាល្លឺម៉ង់)៖ ការប្រកួតដណ្តើមជើងឯកពានរង្វាន់សមាគមបាល់ទាត់អាល្លឺម៉ង់ DFB-Pokal (German Cup 2025) បានរកឃើញក្រុមប្រជែងនៅវគ្គផ្តាច់ព្រ័ត្រហើយ ដោយជាការប៉ះគ្នារវាងក្រុម Arminia Bielefeld តទល់នឹងក្រុមអតីតជើងឯក ៣សម័យកាល VfB Stuttgart ។

ការឈានមកដល់វគ្គផ្តាច់ព្រ័ត្ររបស់ក្រុម VfB Stuttgart គឺបានយកឈ្នះក្រុម RB Leipzig ៣-១ ពីវគ្គ ៤ក្រុមចុងក្រោយ ហើយនេះជាការឡើងមកដល់វគ្គប្រជែងពានជាថ្មីម្តងទៀត ពីការរង់ចាំអស់រយៈពេល ១២ឆ្នាំ បន្ទាប់ពីបានត្រឹមរងជើងឯករដូវកាល២០១២-១៣ ដ្បិតធ្លាប់ឈ្នះពាននេះ ៣លើកមាននៅរដូវកាល១៩៥៤, ១៩៥៨ និងនៅ១៩៩៧ ។

ជាមួយគ្នានេះ គូប្រជែង Arminia Bielefeld នេះក៏ជាការឈានដល់វគ្គផ្តាច់ព្រ័ត្រលើកដំបូងរបស់ពួកគេ ក្នុងការប្រជែងពានរង្វាន់ Germn Cup នាមជាក្រុមកំពុងស្ថិតក្នុងក្របខណ្ឌលីគអាល្លឺម៉ង់លំដាប់ទី៣ បន្ទាប់ពីពួកគេបានយកឈ្នះក្រុមការពារតំណែងជើងឯករដូវកាលមុន Bayer Leverkusen ២-១ ។

ចាំមើលថា ក្រុម Arminia Bielefeld ដែលធ្លាប់ឈ្នះជើងឯកលីគលំដាប់ទី២ Bundesliga 2 ចំនួន ៤លើក អាចក៏សាងប្រវត្តិសាស្ត្របានដែរ រឺទេ ពេលប៉ះក្រុមខ្លាំង VfB Stuttgart ដែលវគ្គផ្តាច់ព្រ័ត្រនឹងលេងនៅថ្ងៃទី២៥ ខែឧសភា ឆ្នាំ២០២៥ ៕