(បរទេស)៖ ក្រុមហ៊ុនបច្ចេកវិទ្យាយក្ស Apple ត្រូវបានគេរាយការណ៍មកថា បាននាំមុខក្នុងនាមជាក្រុមហ៊ុនបច្ចេកវិទ្យារងការធ្លាក់ចុះភាគហ៊ុនច្រើនជាងគេរហូតដល់ ៦% នៅក្នុងការជួញដូរនាព្រឹកថ្ងៃពុធ បន្ទាប់ពីប្រធានាធិបតីលោកដូណាល់ ត្រាំ បានប្រកាសពន្ធថ្មីចន្លោះពី ១០% ទៅ ៤៩% លើទំនិញនាំចូល។ នេះបើយោងតាមការចេញផ្សាយដោយ CNBC នៅថ្ងៃទី០២ ខែមេសា ឆ្នាំ២០២៥។

របាយការណ៍បានបង្ហាញថា ប្រាក់ចំណូលរបស់ Apple ភាគច្រើនបានមកពីឧបករណ៍ដែលផលិតជាចម្បងនៅក្នុងប្រទេសចិន និងប្រទេសមួយចំនួននៅអាស៊ីផ្សេងទៀត។ ទន្ទឹមនឹងនេះ ក្រុមហ៊ុន Nvidia ដែលត្រូវបានគេដឹងថា​ផលិត​បន្ទះ​ឈីប​​នៅ​តៃវ៉ាន់ និង​ដំឡើង​ប្រព័ន្ធ​បញ្ញា​សិប្បនិម្មិត​ AI របស់​ខ្លួន​នៅ​ម៉ិកស៊ិក និង​កន្លែង​ផ្សេង​ទៀត​បាន​ធ្លាក់​ចុះ​ប្រហែល ៤% ខណៈ​ក្រុមហ៊ុន​ផលិតរថយន្ត​អគ្គិសនី Tesla បានធ្លាក់ចុះ ៤.៥%។ មិនត្រឹមតែប៉ុណ្ណោះក្រុមហ៊ុនបច្ចេកវិទ្យាធំៗផ្សេងទៀតរួមមាន Alphabet, Amazon, និង Meta ក៏មានការធ្លាក់ចុះគួរឱ្យកត់សម្គាល់ផងដែរ ជាមួយនឹងការធ្លាក់ចុះចាប់ពី ២.៥% ទៅជាង ៥% ឯណោះ។

គួរជម្រាបថា លោក ត្រាំ បានប្រកាសពីពន្ធថ្មីលើទំនិញនាំចូលនៅរសៀលថ្ងៃពុធ ខណៈលោកបាននិយាយថា វានឹងក្លាយជា «ការប្រកាសឯករាជ្យភាពសេដ្ឋកិច្ច»។ ពន្ធគយរួមមានអត្រា ១០% លើការនាំចូលទាំងអស់ ជាមួយនឹងអត្រាខ្ពស់សម្រាប់ប្រទេសដែលគេយល់ថាជាការអនុវត្តពាណិជ្ជកម្មមិនយុត្តិធម៌លើការនាំចេញរបស់សហរដ្ឋអាមេរិក។ ឧទាហរណ៍ ចិន​​ប្រឈម​នឹង​ពន្ធ ៣៤% សហភាព​អឺរ៉ុប​​ប្រឈម​នឹង​ពន្ធ ២០% ខណៈប្រទេសកម្ពុជាយើងឈានដល់ពន្ធខ្ពស់បំផុត ៤៩%។ យ៉ាងណាក្នុងអំឡុងពេលសុន្ទរកថារបស់ លោក ត្រាំ បានសរសើរ Apple, Meta និង Nvidia សម្រាប់ការចំណាយប្រាក់ និងការវិនិយោគនៅសហរដ្ឋអាមេរិក។ ដោយលោកសង្កត់ធ្ងន់ទៅលើក្រុមហ៊ុន Apple ថា «ក្រុមហ៊ុនផលិត iPhone ដ៏ធំនេះ នឹងចំណាយ ៥០០ ពាន់លានដុល្លារ ពួកគេមិនដែលចំណាយប្រាក់បែបនេះនៅទីនេះទេ»។ ប៉ុន្តែ «ពួកគេនឹងសាងសង់រោងចក្រគេនៅទីនេះ»៕