(កំពត)៖ សភាយុវពាណិជ្ជករអន្តរជាតិសាខាមេគង្គ (JCI Mekong)សហការជាមួយភាគីពាក់ព័ន្ធក្នុងខេត្តកំពត បានរៀបចំសិក្ខាសាលាក្រោមប្រធានបទ «កំពតស្អាតជាមួយការអភិវឌ្ឍន៍ដើម្បីទេសចរណ៍» ដើម្បីបង្កើនការយល់ដឹងអំពីភាពស្អាត ព្រមទាំងចក្ខុវិស័យនៃការអភិវឌ្ឍទេសចរណ៍ក្នុងខេត្តកំពត។

កម្មវិធីនេះ បានរៀបចំឡើង កាលពីថ្ងៃទី៣១ ខែមីនា ឆ្នាំ២០២៥ នៅខេត្តកំពត ដោយមានការចូលរួមពី លោក សយ ស៊ីណុលជាប្រធានមន្ទីរទេសចរណ៍ខេត្តកំពត ម្ចាស់អាជីវកម្មនានា អាជ្ញាធរមូលដ្ឋាន ព្រមទាំងអ្នកពាក់ព័ន្ធផ្សេងៗទៀតផងដែរ។ មិនតែប៉ុណ្ណោះសិក្ខាសាលានេះក៏មានការចូលរួមជាកិត្តិយសផ្ទាល់ពីអាជ្ញាធរមូលដ្ឋាននិងរដ្ឋាភិបាលពាក់ព័ន្ធផ្សេងៗទៀតក្នុងខេត្តកំពតរួមមាន លោក ព្រំ វិសិដ្ឋ អនុប្រធានមន្ទីរបរិស្ថាន, លោកស្រី គង់ សុភា អនុប្រធានមន្ទីរអប់រំ, លោក គង់ ប៊ុនធឿន អភិបាលរងក្រុងកំពត និងលោក រឿន សុខា ចៅសង្កាត់រងទី១កំពង់កណ្តាល។

សិក្ខាសាលានេះ ធ្វើឡើងជាពិសេសដើម្បីបង្កើនការយល់ដឹងអំពីភាពស្អាត ព្រមទាំងចក្ខុវិស័យនៃការអភិវឌ្ឍទេសចរណ៍ក្នុងខេត្តកំពត។ ចំណុចសំខាន់មួយទៀតនៃសិក្ខាសាលា គឺជាការពិភាក្សាជាមួយវាគ្មិនផ្ទាល់ដូចជា លោក សយ ស៊ីណុល ប្រធានមន្ទីរទេសចរណ៍ខេត្តកំពត លោក គឹម សង្រ្គាម អគ្គនាយករងនៃក្រុមហ៊ុន DRSB Express និងអ្នកស្រីង៉ែត កក្កដា នាយិកាកម្មវិធីអង្គការអេពិកអាត ព្រមទាំងម្ចាស់អាជីវកម្មផ្សេងៗទៀតដែលមានបទពិសោធន៍ទៅនឹងវិស័យបរិស្ថានផងដែរ ដើម្បីផ្សារភ្ជាប់ទៅនឹងភាពស្អាតនិង ការអភិវឌ្ឍវិស័យទេសចរណ៍របស់ខេត្តកំពត។

កំពតស្អាត ជាគម្រោងកិច្ចសហប្រតិបត្តិការដែលបានចាប់ផ្តើមតាំងពីឆ្នាំ២០១៩ និងប្រព្រឹត្តឡើងរៀងរាល់ឆ្នាំ ហើយសម្រាប់ឆ្នាំ២០២៥នេះ គឺកាន់តែពិសេស និង អស្ចារ្យជាងឆ្នាំមុនៗទៀតដោយសារ កំពតស្អាតនឹងរៀបចំសកម្មភាពថ្មីៗមួយចំនួនទៀតដូចជា សិក្ខាសាលាជាមួយម្ចាស់អាជីវកម្ម- សិស្សានុសិស្ស ព្រមទាំងកម្មវិធីផ្សេងៗទៀតរួមមាន សិក្ខាសាលាចិត្តស្អាត ស្អាតកាយ៉ាក និងជំរុំសន្និបាតស្អាត ដែលមានការចូលរួមពីសំណាក់ភាគីពាក់ព័ន្ធនានាដូចជា បុគ្គល រដ្ឋាភិបាល វិស័យទេសចរណ៍ វិស័យធុរកិច្ច វិស័យអប់រំ និងអង្គការមិនមែនរដ្ឋាភិបាលផងដែរ។
សិក្ខាសាលាលើកទី១នេះទទួលបានការឧបត្តម្ភ និងគាំទ្រដោយ ៖កម្សាន្តកំពតរីស៊ត(KOMSAN KAMPOT RESORT),មុនី ឥស្សារា(LODGE MONI ESSARA KAMPOT),សមាគមសហគ្រិនវ័យក្មេងកម្ពជា សាខាកំពត¬-កែប(YOUNG ENTREPRENEURS ASSOCIATION OF CAMBODIA KAMPOT-KEP CHAPTER),VISIT KAMPOT,AHHA Education Cambodia និងសហគមយុវវ័យ និងជីវចលនា៕