(ភ្នំពេញ)៖ ធនាគារ ស៊ីអាយអិមប៊ី ភីអិលស៊ី (ធនាគារ CIMB) ដែលជាធនាគារអន្តរជាតិឈានមុខគេមួយ ក្នុងប្រទេសកម្ពុជា និងជាក្រុមហ៊ុនបុត្រសម្ព័ន្ធមួយរបស់ស៊ីអាយអិមប៊ី គ្រុប បានប្រកាសអំពីការតែងតាំងលោក ហុង ជៀប ជាប្រធាននាយកប្រតិបត្តិ (CEO) ថ្មី ចាប់ពីថ្ងៃទី០១ ខែមេសា ឆ្នាំ២០២៥ នេះតទៅ។ លោក ហុង ជៀប បន្តតំណែងពីលោក ប៊ុន យីន ដែលបានចូលនិវត្តន៍ ពីតួនាទីរបស់លោក។

លោក ហុង ជៀប ឡើងកាន់មុខតំណែងថ្មី ជាមួយនឹងចំណេះដឹងជ្រៅជ្រះ និងបទពិសោធន៍ការងារជាច្រើនឆ្នាំ ក្នុងវិស័យធនាគារ នៃប្រទេសកម្ពុជា។ សម្រាប់រយៈពេលប៉ុន្មានឆ្នាំចុងក្រោយនេះ លោកបានកាន់មុខតំណែងជា ប្រធាននាយកប្រតិបត្តិស្តីទី (Acting CEO) ហើយលោកបានដើរតួនាទីយ៉ាងសំខាន់ ក្នុងធនាគារ CIMB ចាប់តាំងពីឆ្នាំ២០១៣ មកម៉្លេះ។ ក្នុងមុខតំណែងជានាយកគ្រប់គ្រងហានិភ័យ របស់ធនាគារ CIMB អស់រយៈពេល ៥ឆ្នាំ ហើយក្រោយមកត្រូវបានតែងតាំងជា នាយកសេវាកម្មហិរញ្ញវត្ថុពាណិជ្ជកម្ម ក្នុងឆ្នាំ២០១៨។ ក្នុងឆ្នាំ២០២១ លោកក៏បានដឹកនាំនាយកដ្ឋានពីរព្រមគ្នា ទាំងសេវាកម្មហិរញ្ញវត្ថុបុគ្គល និងនាយកដ្ឋានសេវាកម្មហិរញ្ញវត្ថុពាណិជ្ជកម្ម។ មុនពេលចូលបម្រើការងារ នៅធនាគារ CIMB លោក ហុង ជៀប ក៏ធ្លាប់បានបម្រើការងារជា នាយកគ្រប់គ្រងហានិភ័យ របស់ធនាគារអន្តរជាតិមួយ នៅក្នុងប្រទេសឡាវផងដែរ។

ជាមួយនឹងបទពិសោធន៍ការងារដ៏លេចធ្លោ លោក ហុង ជៀប មានចំណេះដឹងយ៉ាងស៊ីជម្រៅ លើការវិវឌ្ឍក្នុងទីផ្សារ និងតម្រូវការកើនឡើងរបស់អតិថិជន នៅប្រទេសកម្ពុជា។ ភាពជាអ្នកដឹកនាំរបស់លោក នឹងដើរតួនាទីយ៉ាងសំខាន់ ក្នុងការជំរុញការផ្លាស់ប្តូររបស់ធនាគារ និងបន្តការរីកចម្រើនទៅមួយដំណាក់កាលទៀត ខណៈរក្សាបាននូវគុណភាពទ្រព្យសកម្មល្អប្រសើរ បង្កើនទំហំប្រាក់បញ្ញើ លើកកម្ពស់សមត្ថភាព និងផលិតភាពនៃក្រុមការងារ រួមទាំងបង្កើនប្រាក់ចំណេញ និងភាពរីកចម្រើន សម្រាប់ធនាគារទាំងមូលផងដែរ។ ជាផ្នែកមួយនៃផែនការ Forward30 របស់ស៊ីអាយអិមប៊ី គ្រុប ធនាគារ CIMB ក្នុងប្រទេសកម្ពុជា ត្រូវបានចាត់ថ្នាក់ជាទីផ្សារកំណើនថ្មីរបស់ស៊ីអាយអិមប៊ី គ្រុប ដែលបានបង្កើតឡើង សម្រាប់ប្រតិបត្តិការអាជីវកម្ម ក្រោមការជំរុញឱ្យមានការផ្លាស់ប្ដូរ។

TAN SRI MOHD NASIR AHMAD ប្រធានក្រុមប្រឹក្សាភិបាលរបស់ធនាគារ CIMB ក្នុងប្រទេសកម្ពុជា និងស៊ីអាយអិមប៊ី គ្រុប ដែលមានទីស្នាក់ការកណ្តាល ក្នុងប្រទេសម៉ាឡេស៊ី បានសម្តែងការស្វាគមន៍ និងអបអរសាទរយ៉ាងកក់ក្តៅ ចំពោះលោក ហុង ជៀប សម្រាប់ការតែងតាំងថ្មីនេះ។ លោកបានបញ្ជាក់ថា «យើងមានក្តីសោមនស្សរីករាយ ក្នុងការស្វាគមន៍លោក ហុង ជៀប ដែលបានក្លាយជា ប្រធាននាយកប្រតិបត្តិថ្មី របស់ធនាគារ CIMB ក្នុងប្រទេសកម្ពុជា។ បទពិសោធន៍ការងារដ៏ទូលំទូលាយ និងចំណេះដឹងស៊ីជម្រៅ ក្នុងវិស័យធនាគារ ក្នុងប្រទេសកម្ពុជា ជំរុញឱ្យគាត់ក្លាយជាអ្នកដឹកនាំដ៏ឈ្លាសវៃមួយរូប ក្នុងការបន្តភាពរីកចម្រើន និងជោគជ័យរបស់ធនាគារ។ តាមរយៈបទពិសោធន៍ការងារ ជាមួយនឹងធនាគារ CIMB យើងមានទំនុកចិត្តយ៉ាងពេញទំហឹង ចំពោះសមត្ថភាពរបស់គាត់ ក្នុងការរក្សានូវប្រតិបត្តិការធនាគារ ប្រកបដោយចីរភាព និងទំនួលខុសត្រូវខ្ពស់»។

ឆ្លៀតក្នុងឱកាសនេះ TAN SRI MOHD NASIR AHMAD ក៏បានលើកឡើង អំពីការរួមចំណែកគួរឱ្យកត់សម្គាល់របស់លោក ប៊ុន យីន នាពេលកន្លងមក ចំពោះធនាគារ CIMB ផងដែរថា «យើងសូមសម្តែងការដឹងគុណដ៏ជ្រាលជ្រៅ ចំពោះលោក ប៊ុន យីន សម្រាប់ការខិតខំបំពេញការងារ និងការរួមចំណែកដ៏មានតម្លៃ ដល់ធនាគារ CIMB អស់រយៈពេលជាច្រើនឆ្នាំមកនេះ។ ការដឹកនាំរបស់គាត់ មានសារៈសំខាន់ ក្នុងការប្រែក្លាយធនាគារ CIMB ជាគ្រឹះស្ថានហិរញ្ញវត្ថុឈានមុខគេមួយ ក្នុងប្រទេសកម្ពុជា។ ខ្ញុំមានក្តីសោមនស្សរីករាយ ក្នុងការប្រកាសថា ក្រោយពីការចូលនិវត្តន៍ លើមុខតំណែងជា ប្រធាននាយកប្រតិបត្តិ លោក ប៊ុន យីន នៅតែបន្តបំពេញមុខងារ ក្នុងក្រុមប្រឹក្សាភិបាល របស់ធនាគារ CIMB ក្នុងនាមជា អភិបាលមិនឯករាជ្យ»។

ជាមួយគ្នានេះ លោក NOVAN AMIRUDIN ប្រធាននាយកប្រតិបត្តិ នៃស៊ីអាយអិមប៊ី គ្រុប បានមានប្រសាសន៍ អំពីការផ្លាស់ប្តូរថ្នាក់ដឹកនាំធនាគារដ៏មានសារៈសំខាន់នេះផងដែរថា «បន្ទាប់ពីការពិនិត្យវាយតម្លៃដ៏ល្អិតល្អន់ និងដំណើរការជ្រើសតាំងដ៏ហ្មត់ចត់ ខ្ញុំសម្តែងក្តីរីករាយ ក្នុងការប្រកាសអំពីការតែងតាំងលោក ហុង ជៀប ជា ប្រធាននាយកប្រតិបត្តិ របស់ធនាគារ CIMB ក្នុងប្រទេសកម្ពុជា។ លោក ហុង ជៀប នឹងដឹកនាំធនាគារ CIMB ក្នុងប្រទេសកម្ពុជា សម្រាប់បរិបទថ្មី នៃការផ្លាស់ប្តូរ ដែលប្រែក្លាយទៅជាធនាគារ ដែលមានការយកចិត្តទុកដាក់ខ្ពស់ជាងមុន ជាមួយនឹងការកំណត់ទិសដៅច្បាស់លាស់ និងការផ្តល់គុណតម្លៃល្អជាងគេ តាមរយៈការប្រើប្រាស់ចំណុចខ្លាំង នៃការចាក់គ្រឹះ ក្នុងតំបន់អាស៊ានរបស់យើង។ យើងមានទំនុកចិត្តខ្ពស់ ចំពោះកំណត់ត្រាការងារល្អ សមត្ថភាពដឹកនាំការងារដ៏ខ្លាំង និងចំណេះដឹងស៊ីជម្រៅ ក្នុងទីផ្សារកម្ពុជារបស់លោក ហុង ជៀប ស័ក្តិសមឥតខ្ចោះ ក្នុងការសម្រេចតាមផែនការ Forward30 របស់យើង»។

មិនតែប៉ុណ្ណោះ លោក NOVAN AMIRUDIN បានថ្លែងអំណរគុណ និងជូនពរ ដល់លោក ប៊ុន យីន ដោយសង្ខេបថា «លោក ប៊ុន យីន គឺជាថ្នាក់ដឹកនាំដ៏លេចធ្លោមួយរូបរបស់យើង ហើយចំពោះខ្លួនខ្ញុំផ្ទាល់ ខ្ញុំពិតជាដឹងគុណ សម្រាប់ការគាំទ្រ និងការប្រឹក្សាយោបល់របស់គាត់។ ខ្ញុំសូមថ្លែងអំណរគុណដល់លោក ប៊ុន យីន សម្រាប់ការជួយរួមចំណែក និងការបំពេញការងារដ៏មុះមុតរបស់គាត់ ក្នុងនាមជាប្រធាននាយកប្រតិបត្តិ របស់ធនាគារ CIMB ក្នុងប្រទេសកម្ពុជា នាពេលកន្លងមក»។

តាមរយៈការតែងតាំងនេះ លោក ហុង ជៀប បានសម្តែងការដឹងគុណ និងការប្តេជ្ញាចិត្តខ្ពស់ ចំពោះក្រុមប្រឹក្សាភិបាល ប្រធាននាយកប្រតិបត្តិ នៃស៊ីអាយអិមប៊ី គ្រុប គណៈគ្រប់គ្រង និងបុគ្គលិកទាំងអស់ ដែលបានជឿជាក់លើរូបលោក។ លោកបានមានប្រសាសន៍ថា «ខ្ញុំពិតជាមានកិត្តិយសក្រៃលែង ដែលត្រូវបានតែងតាំងជាប្រធាននាយកប្រតិបត្តិ របស់ធនាគារ CIMB ក្នុងប្រទេសកម្ពុជា ដោយបានផ្តល់ឱកាសឱ្យខ្ញុំ ក្នុងការបំពេញការងារកាន់តែជិតស្និទ្ធ ជាមួយនឹងក្រុមងារដែលពោរពេញដោយថាមពល និងសក្តានុពលបំផុតមួយ។ ខ្ញុំសូមប្តេជ្ញាចិត្ត ក្នុងការពង្រឹងភាពរីកចម្រើនដ៏រឹងមាំរបស់យើង ដែលយើងខិតខំសម្រេចបាន ក្នុងរយៈពេលជាង ១៥ឆ្នាំកន្លងមកនេះ និងប្តេជ្ញាដឹកនាំធនាគារ ឱ្យកាន់តែរីកចម្រើនជាងនេះបន្ថែមទៀត។ ការផ្តោតសំខាន់របស់ខ្ញុំ គឺជាការលើកស្ទួយអតិថិជន និងសង្គមជាតិរបស់យើង ដោយការពង្រឹងទំនាក់ទំនង ជាមួយនឹងអតិថិជន ការជំរុញភាពច្នៃប្រឌិត ការអភិវឌ្ឍសមត្ថភាពបុគ្គលិក និងការជួយរួមចំណែក ដល់កំណើនសេដ្ឋកិច្ចកម្ពុជា»។

ធនាគារ CIMB បានចាក់គ្រឹះវត្តមានយ៉ាងរឹងមាំ ក្នុងទីផ្សារកម្ពុជា អស់រយៈពេលជាង ១៥ឆ្នាំមកហើយ ជាមួយនឹងការផ្ដល់ជូននូវសេវាកម្ម និងផលិតផលធនាគារដ៏សម្បូរបែប ដល់អតិថិជន ផ្នែកសេវាកម្មហិរញ្ញវត្ថុបុគ្គល សេវាកម្មហិរញ្ញពាណិជ្ជកម្ម សេវាកម្មហិរញ្ញវត្ថុ សាជីវកម្ម សេវាប្រតិបត្តិការ និងគ្រឹះស្ថានហិរញ្ញវត្ថុជាដើម។ ជាមួយនឹងចំនួនសាខាធនាគារ ១៤កន្លែង និងចំនួនបុគ្គលិកជិត ៥០០នាក់ ធនាគារ CIMB គឺជាធនាគារលេចធ្លោមួយ ក្នុងវិស័យហិរញ្ញវត្ថុកម្ពុជា៕