(ឡុងដ៍)៖ Gabriel ខ្សែការពាររបស់ Arsenal នឹងអវត្តមានរហូតដល់ចប់រដូវកាលនេះតែម្តង ក្រោយរងរបួសសរសៃពួរជាទម្ងន់នាពេលថ្មីៗនេះ។

នេះមានន័យថា កីឡាករអន្តរជាតិប្រេស៊ីល វ័យ ២៧ឆ្នាំរូបនេះ នឹងអវត្តមានពេលកាំភ្លើងធំលេងទល់នឹង ក្រុមការពារតំណែងជើងឯក Real Madrid ក្នុងកម្មវិធីអឺរ៉ុប UEFA Champions League វគ្គ ៨ក្រុមផងដែរ។

Gabriel ត្រូវបានបង្ខំចិត្តប្តូរចេញនៅវគ្គទី១ ក្នុងប្រកួតដែល Arsenal យកឈ្នះ Fulham ២-១ ក្នុងលីគកំពូលអង់គ្លេស Premier League នៅកីឡដ្ឋាន Emirates កាលពីរាត្រីថ្ងៃអង្គារ។

រូបគេបានបង្ហាញខ្លួនចំនួន ៤២ប្រកួតគ្រប់កម្មវិធីប្រកួតរបស់ក្រុមលោក Mikel Arteta នារដូវកាលឆ្នាំ២០២៤-២៥។ អតីតខ្សែការពារមកពីក្លិប Lille របស់បារាំងរូបនេះ បានចូលលេង ២៨ដង ក្នុងចំណោម ៣០ប្រកួតក្នុងលីគ ដោយបានរួមចំណែកជួយជ្រោមជ្រែងកាំភ្លើងធំរបូតតែ ២៥គ្រាប់ប៉ុណ្ណោះ ដែលជាកំណត់ត្រាដ៏ល្អបំផុតសម្រាប់ពួកគេ។

បច្ចុប្បន្ន Arsenal កំពុងឈរលេខរៀងទី២ នៅ Premier League និងដាច់ ១២ពិន្ទុផងដែរពីក្រុមកំពូលតារាង Liverpool ដោយនៅសល់ ៨ប្រកួតបិទរដូវកាល។ ពួកគេត្រូវស្វាគមន៍ Real Madrid ក្នុងពាន UCL នាថ្ងៃទី០៨ ខែមេសា មុនពេលលេងជើងទី២ នៅទឹកដីអេស្ប៉ាញវិញ ថ្ងៃទី១៦ នៃខែឆ្នាំដដែល៕