(ឡុងដ៍)៖ តាមរយៈជ័យជម្នះ ១ទល់នឹង០ ទៅគូប្រជែង Tottenham Hotspur បានញាំងឱ្យតោខៀវ Chelsea ឡើងទៅឈរលេខ៤ ក្នុងតារាង Premier League 2024-25 ដែលជាតំបន់កៅអីលេងពានអឺរ៉ុបស្វ័យប្រវត្តិ UEFA Champions League រដូវកាលក្រោយ។

ខ្សែបម្រើអន្តរជាតិអាហ្សង់ទីន Enzo Fernandez ជាអ្នករកបានគ្រាប់ជ័យជម្នះនៅនាទី៥០ ពីការបញ្ជូនរបស់ Cole Palmer ក្នុងការជួយក្រុមរបស់លោក Enzo Maresca មាន ៥២ពិន្ទុនាំមុខក្រុមការពារតំណែងជើងឯក Manchester City ធ្លាក់មកលេខ៥ វិញដែលមានតែ ៥១ពិន្ទុ ក្រោយឆ្លងកាត់ ៣០ប្រកួតដូចគ្នា។

តាមរយៈ ៣ពិន្ទុក្នុងកីឡដ្ឋាន Stamford Bridge នាយប់មិញនេះ បានធ្វើឱ្យ Spurs ធ្លាក់ទៅលេខរៀងទី១៤ បណ្តោះអាសន្នដាច់ឆ្ងាយពីកៅអី Top-10 ជាលើកដំបូង គិតចាប់តាំងពីឆ្នាំ២០០៨ ខណៈកំពុងដឹកនាំដោយគ្រូបង្វឹកសញ្ជាតិអូស្រ្តាលី គឺលោក Ange Postecoglou។

ក្រុមភ្ញៀវមាន់ខ្នាយមាស Spurs មានឱកាសតាមស្មើដែរ ពីការស៊ុតក្នុងរយៈចម្ងាយ ២០យ៉ាតរបស់កីឡាករប្តូរចូល Pape Matar Sarr ក៏ប៉ុន្តែត្រូវបដិសេធដោយ VAR ដោយសារខ្សែបម្រើរូបនេះចាប់ទាញ Caicedo នៅមុនពេលបំប៉ោងសំណាញ់ទី៕