(បរទេស)៖ វិនិយោគិនដំបូងបង្អស់របស់ Tesla បានប្រាប់ Sky News ថាលោក Elon Musk គួរតែលាឈប់ពីតំណែងជានាយកប្រតិបត្តិរបស់ក្រុមហ៊ុនផលិតរថយន្ត ព្រោះតែគាត់រវល់ជាមួយការងារថ្មីនៅក្នុងជួររដ្ឋាភិបាលជាមួយលោក Donald Trump ដែលធ្វើឲ្យភាគហ៊ុនរបស់ Tesla មានការធ្លាក់ចុះជាលំដាប់។

លោក Ross Gerber បាននិយាយនៅក្នុងបទសម្ភាសន៍ជាមួយ Sky's Business Live ថា មហាសេដ្ឋី និងទីប្រឹក្សារបស់លោក Donald Trump បានបាត់បង់ការផ្តោតអារម្មណ៍របស់គាត់មកលើក្រុមហ៊ុនផលិតរថយន្ត Tesla ផ្ទុយទៅវិញគាត់ទទួលបានផលប្រយោជន៍ជាច្រើនពីការងារថ្មីរបស់គាត់។

លោក Gerber បាននិយាយថា “ខ្ញុំគិតថា Tesla ត្រូវការនាយកប្រតិបត្តិថ្មី ហើយខ្ញុំបានសម្រេចចិត្តនៅថ្ងៃនេះថាខ្ញុំនឹងចាប់ផ្តើមនិយាយវា ដូច្នេះហើយនេះគឺជាកម្មវិធីដំបូងដែលខ្ញុំនិយាយវា។

លោកបានបន្ថែមទៀតថា វាជាពេលវេលាសម្រាប់នរណាម្នាក់ដើម្បីដំណើរការ Tesla ។ អាជីវកម្មនេះត្រូវបានធ្វេសប្រហែសយូរពេក។ មានរឿងសំខាន់ៗជាច្រើនដែល Tesla កំពុងធ្វើ ដូច្នេះ Elon គួរតែត្រលប់មក Tesla ហើយធ្វើជា CEO របស់ក្រុមហ៊ុន Tesla ហើយបោះបង់ការងារផ្សេងទៀតរបស់គាត់ ឬគាត់គួរតែផ្តោតលើរដ្ឋាភិបាល ហើយបន្តធ្វើអ្វីដែលគាត់កំពុងធ្វើ ប៉ុន្តែត្រូវស្វែងរក CEO ដែលសមរម្យសម្រាប់ Tesla។

វិនិយោគិនរូបនេះបានលើកឡើងថា នៅពេលនេះ Tesla កំពុងស្ថិតនៅក្នុងវិបត្ដិអាជីវកម្ម ដោយតម្លៃទីផ្សាររបស់ក្រុមហ៊ុន Tesla បានធ្លាក់ចុះជាង ៨០០ពាន់លានដុល្លារចាប់តាំងពីខែធ្នូ ហើយវាបានធ្លាក់ចុះ ៤% បន្ថែមទៀតនៅក្នុងការជួញដូរនៅសហរដ្ឋអាមេរិកកាលពីថ្ងៃអង្គារ។

លោក Gerber បាននិយាយថា ខណៈពេលដែលផលិតផលរបស់ក្រុមហ៊ុន Tesla ផលិតបានមកយ៉ាងល្អបំផុតគឺលោក
Musk មានពេលត្រឹមតែ ២៤ម៉ោងក្នុងមួយថ្ងៃ ប៉ុន្តែចាប់ពីគាត់បានទិញ Twitter ឥឡូវប្ដូរទៅ X គឺគាត់បានបែងចែកពេលវេលាតិចបំផុតសម្រាប់ Tesla ។ មិនតែប៉ុណ្ណោះលោក Gerber បាននិយាយចំៗថា ការបង្ហោះរូបភាពគាត់ និងលោក Trump នៅកន្លែងធ្វើការគឺវាបានជះផលអវិជ្ជមានច្រើនពេកមកដល់ក្រុមហ៊ុន Tesla។

លោកបានមានប្រសាសន៍ថា “កេរ្តិ៍ឈ្មោះរបស់ក្រុមហ៊ុនទើបតែត្រូវបានបំផ្លាញដោយ Elon Musk”។

គួរបញ្ជាក់ផងដែរថា មានសារព័ត៌មានជាច្រើនបានចុះផ្សាយថា ក្រុមប្រឹក្សាភិបាលរបស់ Tesla បានស្នើសុំឲ្យលោក Elon Musk ចុះចេញពីតំណែង CEO ក្រោមហេតុផលសំខាន់ធំៗពីគឺភាគហ៊ុនក្រុមហ៊ុនធ្លាក់ចុះ និងលោកគ្មានពេលវេលាគ្រប់គ្រាន់សម្រាប់ដឹកនាំក្រុមហ៊ុន៕