(បរទេស)៖ ប្រធានសហព័ន្ធបាល់ទាត់អន្តរជាតិ FIFA លោក Gianni Infantino បានថ្លែងថា ចក្រភពអង់គ្លេស (UK) កាន់តែខិតជិត ក្នុងការទទួលរៀបចំព្រឹត្តិការណ៍ 2035 Women’s World Cup ដោយពុំមានគូប្រជែងឡើយ។

ប្រទេសអង់គ្លេស ស្កុតឡេន វ៉េល និងអៀរឡង់ខាងជើង បានដាក់សំណើរួមគ្នាទៅកាន់ FIFA កាលពីខែមីនា ឆ្នាំ២០២៥ ដើម្បីទទួលបានសិទ្ធិរៀបចំកម្មវិធី ៤ឆ្នាំម្តង ក្នុងទឹកដីរបស់ពួកគេ។

ស្ថិតក្រោមគោលការណ៍របស់ FIFA យុទ្ធនាការនៅឆ្នាំ២០៣៥ ខាងមុខនេះ គឺត្រូវតែធ្វើឡើងនៅ ២តំបន់ប៉ុណ្ណោះដោយរួមមាន ទ្វីបអឺរ៉ុប (UEFA) និងទ្វីបអាហ្រ្វិក (CAF) តែប៉ុណ្ណោះ។

យ៉ាងណាមិញ កាលបរិច្ឆេទទទួលពាក្យក្នុងការសុំសិទ្ធិធ្វើម្ចាស់ផ្ទះ ត្រូវបានបិទហើយកាលពីថ្ងៃចន្ទដើមសប្តាហ៍នេះ គ្រាដែល FIFA បានបញ្ជាក់ថា មានតែ UK ដែលបានដាក់ពាក្យដេញថ្លៃសម្រាប់ឆ្នាំ២០៣៥ តពីសហរដ្ឋអាមេរិកដែលគ្រោងធ្វើម្ចាស់ផ្ទះនៅឆ្នាំ២០៣១។

ប្រមុខ FIFA ខាងលើដែលបានចូលរួមក្នុងកិច្ចប្រជុំប្រតិបត្តិរបស់ UEFA នៅទីក្រុង Belgrade នោះបានថ្លែងថា «ថ្ងៃនេះខ្ញុំសូមជម្រាបផងថា អំពីដំណើរការនៃការដេញថ្លៃធ្វើម្ចាស់ផ្ទះបាល់ទាត់ស្រ្តី គឺទទួលបានពាក្យស្នើសុំតែមួយពីអាមេរិក សម្រាប់ឆ្នាំ២០៣១ និងឆ្នាំ២០៣៥ មានតែ UK ប៉ុណ្ណោះ»។

លើសពីនេះទៀតលោក Infantino ក៏បានបញ្ជាក់បន្ថែមថា Women’s World Cup 2031 នឹងបង្កើនដល់ ៤៨ក្រុមដូចបុរសដែរ ស្របពេលវគ្គ ៣២ក្រុមមានត្រឹមតែឆ្នាំ២០២៧ ប៉ុណ្ណោះ នៅពេលស្រ្តីអេស្ប៉ាញជាម្ចាស់ជើងឯកក្រោយគេ នៅឆ្នាំ២០២៣ ហើយស្រ្តីសហរដ្ឋអាមេរិក ជោគជ័យជាងគេក្នុងពាននេះ៕