(បរទេស)៖ ByteDance ដែលជាក្រុមហ៊ុនមេរបស់ TikTok ត្រូវបានគេរាយការណ៍មកថា អាចនឹងប្រឈមមុខនឹងការពិន័យរហូតដល់ ៥០០លានអឺរ៉ូ ពាក់ព័ន្ធនឹងការបញ្ជូនទិន្នន័យរបស់ប្រើប្រាស់អ៉ឺរ៉ុបដោយខុសច្បាប់ទៅកាន់ប្រទេសចិន។ នេះបើយោងតាមការចេញផ្សាយដោយសារព័ត៌មាន Bloomberg នៅថ្ងៃទី០៤ ខែមេសា ឆ្នាំ២០២៥។

ប្រភពខាងលើបានរាយការណ៍ថា បើសិនជាការស៊ើបអង្កេតបានរកឃើញថាទិន្នន័យអ្នកប្រើប្រាស់ TikTok នៅអ៊ឺរ៉ុបត្រូវបានបញ្ជូនទៅកាន់ប្រទេសចិន នោះមានន័យថា វាបានបំពានបទប្បញ្ញត្តិការពារទិន្នន័យទូទៅរបស់សហភាពអ៊ឺរ៉ុប (GDPR) ដូច្នេះ ByteDance ដែលជាមេធំរបស់ TikTok នឹងត្រូវរងការផាកពិន័យ។

ពាក់ព័ន្ធនឹងករណីនេះ TikTok ឬ ByteDance អាចដាក់សំណើទៅកាន់តុលាការឧទ្ធរណ៍បាន។

តាមពិតទៅមិនមែនតែ TikTok ប៉ុណ្ណោះទេ ដែលប្រឈមមុខនឹងការពិន័យលើការបំពានបទប្បញ្ញត្តិនេះ កាលពី ២០២១ ក្រុមហ៊ុន Amazon ធ្លាប់ត្រូវបានពិន័យ ៧៤៦លានអឺរ៉ូ ខណៈដែលកាលពីឆ្នាំ ២០២៣ ក្រុមហ៊ុន Meta ដែលជាមេធំ Facebook ត្រូវបានពិន័យ ១,២ពាន់លានអឺរ៉ូ៕