(មេនឆេស្ទើ)៖ កីឡាករដែលពូកែបញ្ជូនបាល់ច្បាស់ៗ Kevin de Bruyne បានប្រកាសជាផ្លូវការនាថ្ងៃទី០៤ ខែមេសា ថានឹងចាកចេញពីក្លិបមេឃខៀវ Manchester City នៅពេលចប់រដូវកាលឆ្នាំ២០២៤-២៥ បន្ទាប់ពីរួមរស់បាន ១០ឆ្នាំកន្លងមក។

ពីគេហទំព័រកីឡា BBC បានចេញផ្សាយថា ការចំណាយពេល ១០ឆ្នាំនៅកីឡដ្ឋាន Etihad ខ្សែបម្រើសំខាន់បំផុតរូបនេះ បានឈ្នះពានលីគកំពូលអង់គ្លេស Premier League បានចំនួន ៦លើកជាមួយ Man City មុនពេលឈានដល់ផ្លូវបំបែក ដោយពុំមានបន្តកិច្ចសន្យាថ្មីទៀតទេ។

នៅចាំបានថា កីឡាករសញ្ជាតិប៊ែលហ្សិក De Bruyne ដែលនឹងឈានចូលវគ្គ ៣៤ឆ្នាំនាខែមិថុនាខាងមុខ បានឈ្នះពានសរុបមានដល់ទៅ ១៦ពានជាមួយមេឃខៀវ ក្រោយពេលផ្លាស់ចេញពីក្លិប Wolfsburg នាអំឡុងឆ្នាំ២០១៥ ក្នុងនោះក៏រួមានធំ UEFA Champions League ក្នុងឆ្នាំ២០២៣ ទៀតផង។

Kevin de Bruyne បានឈានដល់កម្រិតកំពូលលំដាប់ពិភពលោក ក្នុងនាមខ្សែបម្រើឆ្នើមទាំងក្នុងក្លិបអាជីព និងក្រុមជម្រើសជាតិប៊ែលហ្សិក ស្ថិតក្រោមការបង្វឹករបស់គ្រូបច្ចុប្បន្នគឺលោក Pep Guardiola។ រូបគេបានប្រកាសថានឹងចាកចេញពី City នៅលើបណ្តាញសង្គម X របស់ខ្លួនកាលពីថ្ងៃសុក្រម្សិលមិញ ស្របពេលក្រុមការពារជើងឯកលីគ កំពុងស្ថិតនៅលេខរៀងទី៥ ផងដែរ៕