(បរទេស)៖ ក្រុមអ្នកវិភាគបាននិយាយនៅថ្ងៃព្រហស្បតិ៍សប្តាហ៍នេះថា ទូរស័ព្ទ iPhone អាចនឹងមានតម្លៃថ្លៃជាងមុនក្នុងពេលឆាប់ៗខាងមុខ ដោយសារពន្ធគយ។ ទាំងនេះ គឺបន្ទាប់ពីប្រធានាធិបតីអាមេរិក លោក ដូណាល់ ត្រាំ បានដាក់ពន្ធគយជាបន្តបន្ទាប់លើប្រទេសជុំវិញពិភពលោក ដែលអាចនឹងផ្លាស់ប្តូរយ៉ាងខ្លាំងនូវទិដ្ឋភាពនៃពាណិជ្ជកម្មពិភពលោក ហើយទំនិញប្រើប្រាស់ដូចជា iPhones អាចស្ថិតក្នុងចំណោមផលប៉ះពាល់ដ៏ធ្ងន់ធ្ងរបំផុត ជាមួយនឹងការកើនតម្លៃចន្លោះពី ៣០% ទៅ ៤០%។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៤ ខែមេសា ឆ្នាំ២០២៥។

Apple គឺជាក្រុមហ៊ុនផលិតស្មាតហ្វូនខ្នាតយក្ស ដោយក្នុងមួយឆ្នាំក្រុមហ៊ុននេះលក់ iPhone បានជាង​ ២២០លានគ្រឿង។ ទីផ្សារធំបំផុតរបស់ Apple រួមមាន សហរដ្ឋអាមេរិក ចិន និងអឺរ៉ុប។ យ៉ាងណាមិញ​ បើយោងតាមរបាយការណ៍ព្យាករណ៍របស់អ្នកវិភាគនៅ Rosenblatt Securities បានបង្ហាញថា នឹងមានការកើនឡើងថ្លៃខ្ទង់ ៤៣% ដោយ iPhone 16 ធម្មតាបច្ចុប្បន្នដាក់លក់នៅអាមេរិកមានតម្លៃ ៧៩៩ដុល្លារ ប៉ុន្តែអាចនឹងឈានដល់ ១,១៤៥ដុល្លារនាពេលខាងមុខ។ ខណៈ iPhone 16 Pro Max ទំហំផ្ទុក 1T (១ តេហ្គាបៃ) បច្ចុប្បន្នមានតម្លៃ ១,៥៩៩ដុល្លារ ហើយអាចនឹងមានតម្លៃជិត ២,៣០០ដុល្លារ នៅពេលដែល Apple នាំចេញទៅក្រៅ ប្រសិនបើពន្ធត្រូវបានបញ្ចូល។

គួរជមម្រាបថា iPhone ភាគច្រើននៅតែផលិតនៅក្នុងប្រទេសចិន ដែលត្រូវបានវាយលុកដោយពន្ធ ៥៤% តាមរយៈការប៉ាន់ស្មានប្រហែល ៨០% នៃសមត្ថភាពផលិតរបស់ Apple គឺពឹងផ្អែកនៅទីនោះ។ ទាក់ទិននឹងករណីនេះ បើទោះបីជាផលិតកម្មមួយចំនួនកំពុងផ្លាស់ប្តូរទៅកាន់ប្រទេសវៀតណាម និងឥណ្ឌាក៏ដោយ ក៏ប្រទេសទាំងនេះប្រឈមនឹងពន្ធ ៤៦% និង ២៦% រៀងៗខ្លួនផងដែរ ដែលជាហេតុធ្វើឱ្យតម្លៃ iPhone កើនឡើងថ្លៃខ្លាំងបែបនេះ៕