(ប៊ែកឡាំង)៖ កីឡាករ Mats Hummels សមាជិកឈ្នះជើងឯកបាល់ទាត់ពិភពលោក World Cup 2014 ជាមួយក្រុមឥន្រ្ទីដែកអាល្លឺម៉ង់ នៅប្រទេសប្រេស៊ីលនោះ បានប្រកាសពីការព្យួរស្បែកជើងនៅលើជញ្ជាំងហើយ នៅពេលចប់សព្វគ្រប់រដូវកាលឆ្នាំ២០២៤-២៥ នេះ។

ខ្សែការពារចាស់វស្សា វ័យ ៣៦ឆ្នាំរូបនេះ នឹងអស់សុពលភាពកិច្ចសន្យាជាមួយក្លិបលេងនៅ Serie A បច្ចុប្បន្ន AS Roma នាខែមិថុនា ឆ្នាំ២០២៥ ខាងមុខ ដោយលោកបានជូនដំណឹងនៅលើបណ្តាញសង្គមផ្ទាល់ខ្លួនថា «ជាពេលវេលាចុងក្រោយសម្រាប់អាជីពបាល់ទាត់របស់លោក»។

លោកថា «ថ្ងៃដែលខ្ញុំទន្ទឹងរង់ចាំជាយូរ បានមកដល់ហើយ ដែលជាថ្ងៃរាល់កីឡាករបាល់ទាត់ទាំងអស់ មិនអាចជៀសផុត។ ការរត់នៅលើទីលានរយៈពេល ១៨ឆ្នាំរបស់ខ្ញុំបានមកដល់ ជាមួយនឹងការផ្តល់នូវរឿងរ៉ាវគ្រប់យ៉ាងទៀតផង»។

Hummels គឺជាតួអង្គសំខាន់មួយរូប ដែលបានរួមចំណែកជួយអាល្លឺម៉ង់ទទួលបានជើងឯក World Cup គម្រប់លើកទី៤ របស់ពួកគេ និងលេងបាន ៧៨ប្រកួតផងដែរជាមួយប្រទេសរបស់លោកចាប់ពីឆ្នាំ២០១០ ដល់ឆ្នាំ២០២៣ ដោយរកបាន ៥គ្រាប់ផងដែរ៕