(ប៉ារីស)៖ ក្រុមបាល់ទាត់ Paris Saint Germain នឹងត្រូវប្រកាសជាជើងឯកលីគកំពូល Ligue 1 របស់បារាំងនារដូវកាលនេះតែម្តង ជាមួយនឹងកំណត់ត្រាដ៏អស្ចារ្យផងដែរ តាមរយៈលេង ២៧ប្រកួតមិនទាន់ចាញ់នោះទេ។

ពីគេហទំព័រកីឡា BBC បានចេញផ្សាយថា ក្រុមដែលកំពុងដឹកនាំដោយបុរសសញ្ជាតិអេស្ប៉ាញ Luis Enrique មុខកំពូលតារាងដាច់ដល់ទៅ ២១ពិន្ទុ បើធៀបនឹងក្រុមលេខ២ AS Monaco ក្រោយឆ្លងកាត់បាន ២៧ប្រកួតដូចគ្នា ដែលត្រូវប៉ះ Angers ក្នុងដីរបស់ពួកគេផងដែរ នារាត្រីថ្ងៃសៅរ៍ ទី០៥ ខែមេសានេះ។

ប្រសិនបើបន្តកំណត់ត្រាលេងមិនចាញ់ នោះមានន័យថា PSG ដែលបានទម្លាក់ Liverpool ដើម្បីឡើងវគ្គ ៨ក្រុម UCL នឹងត្រូវប្រកាសជាជើងឯក Ligue 1 តែម្តង បើទោះបីជានៅសល់ ៦ប្រកួតទៀតក៏ដោយ។

PSG និង FC Barcelona របស់អេស្ប៉ាញ ជាក្រុមលេងមិនទាន់ចាញ់ក្នុងលីគដូចគ្នា សម្រាប់រដូវកាលនេះ ក្នុងចំណោមលីគធំៗទាំង ៥នៅអឺរ៉ុប។ វានឹងក្លាយជាជំនាន់ទី៣ នៅបារាំង ដែលបានប្រកាសជើងឯក Ligue 1 ដែលនៅសល់ច្រើនប្រកួត នៅពេលពួកគេធ្លាប់ធ្វើបានកាលឆ្នាំ២០១៦ ដែលនៅសល់ ៨ប្រកួត ហើយ Lyon ធ្លាប់ធ្វើបានដោយនៅសល់ ៦ប្រកួតទៀតកាលឆ្នាំ២០០៧៕