(ភ្នំពេញ)៖ វគ្គបំប៉នសមត្ថភាព ស្តីពីការរៀបចំ និងគ្រប់គ្រងព្រឹត្តិការណ៍កីឡា ដែលរៀបចំដោយក្រសួងអប់រំ យុវជន និងកីឡា បានប្រព្រឹត្តទៅដោយជោគជ័យ ខណៈមន្ដ្រីជំនាញ រំពឹងវគ្គដ៏មានសារៈសំខាន់នេះ នឹងពង្រឹងស្ដង់ដានៃការរៀបចំ និងគ្រប់គ្រងព្រឹត្តិការណ៍កីឡាកាន់តែល្អប្រសើរ ពិសេសដើម្បីត្រៀមលក្ខណៈធ្វើម្ចាស់ផ្ទះការប្រកួតកីឡាសាកលវិទ្យាល័យអាស៊ាន លើកទី២៣ ឆ្នាំ២០២៨ និងកីឡាយុវជនអាស៊ី លើកទី៤ ឆ្នាំ២០២៩ នៅកម្ពុជា។
លោក ធិន វិចិត្រ គណៈគ្រប់គ្រងវគ្គនេះ បានដឹងថា មានរយៈពេល ៤ថ្ងៃ ចាប់ពីថ្ងៃទី១-៤ ខែមេសា ឆ្នាំ២០២៥ នៅមជ្ឈមណ្ឌលជាតិហ្វឹកហ្វឺនកីឡា ដោយមានសិក្ខាកាមចូលរួមចំនួន ៨០នាក់ មកពី ២៥រាជធានី-ខេត្ត និងសហព័ន្ធកីឡាជាតិចំនួន៣៦ ដែលបានបញ្ចប់ដោជោគជ័យ តាមរយៈការផ្ដល់នូវចំណេះដឹង និងជំនាញសំខាន់ៗ ដើម្បីបង្កើនការរៀបចំផែនការ ការអនុវត្ត និងអភិបាលកិច្ចនៃការប្រកួតកីឡា ហើយវគ្គបណ្តុះបណ្តាលបានគ្របដណ្តប់លើផ្នែកសំខាន់ៗដែលមានសារៈសំខាន់ ចំពោះការអភិវឌ្ឍឧស្សាហកម្មកីឡាប្រកបដោយនិរន្តរភាព និងវិជ្ជាជីវៈ។
អនុប្រធាននាយកដ្ឋានរៀបចំព្រឹត្តិការណ៍និងស្ថិតិកីឡាដដែលបន្ថែមថា វគ្គបំប៉នេះ ផ្តោសំខាន់លើស្តង់ដាការប្រកួតកីឡាលក្ខណៈជ្រើសរើសជើងឯក, អភិបាលកិច្ចល្អក្នុងកីឡា, ការគ្រប់គ្រងព្រឹត្តិការណ៍កីឡា, ការធ្វើទីផ្សារ និងចលនូបត្ថម្ភកីឡា, ឧស្សាហកម្មកីឡា , ស្តង់ដានៃការរៀបចំការប្រកួត, ស្តង់ដាការប្រកួតកីឡាជាតិ, ការចុះឈ្មោះតាមប្រព័ន្ធព័ត៌មានវិទ្យា, អ្នកស្ម័គ្រចិត្តចូលរួមក្នុងព្រឹត្តិការណ៍កីឡា, ការយល់ដឹងពីដូប៉ា។
ថ្លែងក្នុងពិធីបិទវគ្គនេះ លោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា បានគូសបញ្ជាក់ថា បច្ចុប្បន្ននេះ វិស័យកីឡាមានការរីកចម្រើនគួរឲ្យកត់សម្គាល់ ជាពិសេសការចូលរួមគាំទ្រយ៉ាងច្រើនពី យុវជន ហើយលទ្ធផលនៃការប្រកួតជាលក្ខណៈអន្តរជាតិមានការប្រែប្រួលជាវិជ្ជមាន ទទួលបានការអបអរសាទរពីមហាជនរហូតដល់ថ្នាក់ដឹកនាំរាជរដ្ឋាភិបាល។ សមិទ្ធផលខាងលើ មិនអាចកាត់ផ្តាច់ចេញបានពីនយោបាយឈ្នះឈ្នះ របស់សម្តេចតេជោ ហ៊ុន សែន ប្រធានព្រឹទ្ធសភា និងជាអតីតនាយករដ្ឋមន្រ្តី ហើយបច្ចុប្បន្ន សម្តេចធិបតី ហ៊ុន ម៉ាណែត នាយករដ្ឋមន្ត្រីបន្តដឹកនាំ និងរក្សាសុខសន្តិភាពជូនប្រទេសកម្ពុជា និងប្រជាជនកម្ពុជា។
ដូច្នេះសិក្ខាកាមទាំងអស់ ដែលបានចូលរួមក្នុងវគ្គដ៏មានតម្លៃនាពេលនេះ ត្រូវយកចំណេះដឹងថ្មីៗដែលគ្រូឧទ្ទេសបានផ្តល់ឲ្យដើម្បីយកទៅអនុវត្តក្នុងការរៀបចំ ដឹកនាំ និងគ្រប់គ្រងការប្រកួតឲ្យបានល្អប្រសើរ ស្របតាមស្តង់ដានៃការរៀបចំការប្រកួត ក៏ដូចជារួមចំណែកជំរុញការអភិវឌ្ឍវិស័យកីឡាកម្ពុជាឲ្យកាន់តែរីកចម្រើន ដើម្បីត្រៀមលក្ខណៈចូលរួម និងត្រៀមធ្វើម្ចាស់ផ្ទះរៀបចំព្រឹត្តិការណ៍ថ្នាក់ជាតិ និងអន្ដរជាតិនានា៕
