(បរទេស)៖ សារព័ត៌មាន Bloomberg News បានរាយការណ៍មកថា ក្រុមហ៊ុនបច្ចេកវិទ្យាយក្ស Meta Platforms គ្រោងចាយទុនវិនិយោគជិត ១ ពាន់លានដុល្លារនៅក្នុងគម្រោងមជ្ឈមណ្ឌលទិន្នន័យដែលមានទីតាំងនៅកណ្តាលរដ្ឋ Wisconsin សហរដ្ឋអាមេរិក​ ដែលជាផ្នែកមួយនៃការវិនិយោគរបស់ខ្លួននៅក្នុងបច្ចេកវិទ្យាបញ្ញាសិប្បនិម្មិត AI។ នេះបើយោងតាមការចុះផ្សាយបន្តពីទីភ្នាក់ងារសារព័ត៌មាន Reuters នៅថ្ងៃទី០៥ ខែមេសា ឆ្នាំ២០២៥។

របាយការណ៍ដដែលបានឱ្យដឹងទៀតថា នៅក្នុងខែកុម្ភៈ រដ្ឋ Wisconsin បានឈានដល់កិច្ចព្រមព្រៀងជាបន្តបន្ទាប់ជាមួយក្រុមហ៊ុនដ៏ធំ (មិនបង្ហាញឈ្មោះ) ដើម្បីបង្កើតមជ្ឈមណ្ឌលទិន្នន័យនៅទីនោះជាមួយនឹងការវិនិយោគច្រើនឆ្នាំដែលរំពឹងទុកមានចំនួន ៨៣៧លានដុល្លារ។ ប៉ុន្តែត្រូវបានគេដឹងថា ក្រុមហ៊ុននៅពីក្រោយគម្រោងនោះក៏មានវត្តមានរបស់ Meta ផងដែរ។

យ៉ាងណាមិញ ជុំវិញគម្រោងវិនិយោគជាក់លាក់ទាំងក្រុមហ៊ុន Meta និង Wisconsin Economic Development Corp នៅមិនទាន់មានការបញ្ជាក់លម្អិតនោះទេ ខណៈបានបដិសេធមិនធ្វើអត្ថាធិប្បាយលើរបាយការណ៍នេះ នៅពេលទាក់ទងដោយ Reuters ។

គួរជម្រាបថា គម្រោងវិនិយោគនេះស្របនឹងបំណងរបស់ Meta ក្នុងការចំណាយរហូតដល់ ៦៥ ពាន់លានដុល្លារនៅឆ្នាំនេះលើហេដ្ឋារចនាសម្ព័ន្ធដែលផ្តោតលើ AI ដែលរួមមានកន្លែងសំខាន់មួយទៀតនៅក្នុងរដ្ឋ Louisiana។ ប៉ុន្តែអនាគតនៅមិនទាន់ច្បាស់នៅឡើយនោះទេ ដោយអ្នកវិភាគបាននិយាយនៅថ្ងៃព្រហស្បតិ៍សប្តាហ៍នេះថា ពន្ធគយដ៏ច្រើនសន្ធឹកសន្ធាប់របស់ប្រធានាធិបតីអាមេរិកលោក Donald Trump អាចរារាំងដល់កិច្ចខិតខំប្រឹងប្រែងរាប់ពាន់លានដុល្លាររបស់ Big Tech ក្នុងការកសាងហេដ្ឋារចនាសម្ព័ន្ធ AI នៅក្នុងប្រទេស ដែលទំនងជាធ្វើឱ្យខូចដល់គោលដៅសំខាន់របស់រដ្ឋបាល៕