(ភ្នំពេញ)៖ លោក Pep Munoz គ្រូបង្វឹកក្រុមព្រះខ័នរាជស្វាយរៀង ចង់បំបែកកំណត់ត្រាមួយ ក្នុងជំនួបជើងទី៣ នៃលីគកំពូលកម្ពុជា ឆ្នាំ២០២៤/២៥ ជាមួយក្រុមភ្នំពេញក្រោន នៅល្ងាចថ្ងៃទី៥ ខែមេសា ឆ្នាំ២០២៥ នេះ ដោយលោកចង់ឈ្នះលើទឹកដីក្រុមសិង្ហក្រហម បន្ទាប់ពីដឹកនាំជាង ១ឆ្នាំកន្លះកន្លងមក ព្រះខ័នរាជស្វាយរៀង មិនទាន់ស្គាល់ឈ្នះម្ចាស់ផ្ទះភ្នំពេញក្រោនឡើយ។
គ្រូបង្វឹកជនជាតិអេស្ប៉ាញខាងលើ បានលើកឡើងក្នុងសន្និសីទមុនការប្រកួតថា នេះគឺជាជំនួបដ៏គួរចាប់អារម្មណ៍សម្រាប់ទស្សនិកជន ហើយក៏ជាការប្រកួតដ៏សំខាន់សម្រាប់ព្រះខ័នរាជស្វាយរៀង ដ្បិតក្រុមត្រូវការជ័យជម្នះ ដើម្បីរក្សាកៅអីកំពូលតារាង ។ យ៉ាងណាលោកថា ក្រុមកំពុងស្ថិតក្នុងស្ថានភាពល្អ ជាមួយការត្រៀមបានល្អ សម្រាប់ការប្រកួតនេះ ។ ដូច្នេះលោកនឹងព្យាយាមធ្វើឲ្យបានល្អ ដើម្បីដណ្ដើម ៣ពិន្ទុត្រឡប់ទៅផ្ទះវិញ ។
លោក Pep ថា «ពេលភ្នំពេញក្រោនលេងក្នុងដីយើង(ជើងទី២) ពេលនោះ ភ្នំពេញក្រោនមិនទាន់ចាញ់ទេ ហើយពេលនោះ យើងកំពុងមានសម្ពាធដែរ ដោយសារយើងចាញ់ប្រៀបភ្នំពេញក្រោន ៤ពិន្ទុ តែប្រកួតនេះ យើងលើសភ្នំពេញក្រោន ១ពិន្ទុវិញ ។ សម្រាប់ខ្ញុំរយៈពេល ១ឆ្នាំកន្លះមកហើយ ដែលមិនទាន់ឈ្នះភ្នំពេញក្រោនក្នុងដី ។ អ៊ីចឹងខ្ញុំពិតជាចង់ឈ្នះការប្រកួតក្នុងដីពួកគេ ។ អ្វីដែលសំខាន់ សម្រាប់ខ្ញុំ មិនមែនត្រឹមតែចង់ឈ្នះទេ គឺយើងមកទីនេះ យើងចង់ផ្ដល់ឲ្យនូវការប្រកួតមួយដ៏ល្អ បង្ហាញពីឆន្ទៈ និងមហិច្ឆតារបស់យើង ពិសេសគឺលេងឲ្យបានល្អនៅទីនេះ» ។
គួរដឹងថា បច្ចុប្បន្នក្រុមទាំងពីរ កំពុងមានពិន្ទុប្រកៀកប្រកិតគ្នា ដោយព្រះខ័នរាជស្វាយរៀង ឈរកំពូលតារាងរកបាន ៦១ពិន្ទុ គ្រាដែលភ្នំពេញក្រោន ឈរលេខ២ រកបាន ៦០ពិន្ទុ ។ ដូច្នេះជំនួបល្ងាចនេះ ពិតជាសំខាន់ ខណៈក្រុមឈ្នះ នឹងត្រូវឈរកំពូលតារាង គ្រាដែលបើស្មើគ្នា ក្រុមទាំងពីរ នឹងរក្សាចំណាត់ថ្នាក់ដដែល តែនឹងបើកឱកាសដល់គូប្រជែងមួយទៀត គឺវិសាខា ដែលកំពុងឈរលេខ៣ និងមាន ៥៦ពិន្ទុងក្នុងដៃ កាន់តែមានសង្ឃឹមក្នុងការប្រជែងពាន ។ ចំពោះលទ្ធផលជួបគ្នា ២ជើងកន្លងមក ក្រុមទាំងពីរ បានឈ្នះម្ដងម្នាក់ ដោយជើងទី១ ភ្នំពេញក្រោនបានឈ្នះក្នុងដី ៤-៣ គ្រាដែលជើងទី២ ព្រះខ័នរាជស្វាយរៀង បានឈ្នះក្នុងដីវិញ ៣-១។ ដូច្នេះចាំមើលល្ងាចនេះ តើព្រះខ័នរាជ ឬភ្នំពេញក្រោន នឹងទទួលបាន ៣ពិន្ទុបន្ថែម?
