(បរទេស)​៖ សារព័ត៌មាន Bloomberg បានរាយការណ៍មកថាលោក David Lau ដែលជាអនុប្រធានផ្នែកវិស្វកម្មសូហ្វវែររបស់ក្រុមហ៊ុន Tesla កំពុងចុះចេញពីតំណែង បន្ទាប់ពីធ្វើការអស់រយៈពេលជាង ១២ ឆ្នាំនៅទីនោះ។ នេះបើយោងតាមការចេញផ្សាយបន្តពីដោយទីភ្នាក់ងារសារព័ត៌មាន Reuters នៅថ្ងៃទី០៥ ខែមេសា ឆ្នាំ២០២៥។

យោងតាមរយៈទំព័រ LinkedIn របស់គាត់ លោក​ Lau បានកាន់តួនាទីជាអនុប្រធានចាប់តាំងពីឆ្នាំ២០១៧ មកម្លេះហើយបានដើរតួយ៉ាងសំខាន់ក្នុងការត្រួតពិនិត្យការអភិវឌ្ឍន៍កម្មវិធីសម្រាប់រថយន្ត Tesla សេវាកម្ម cloud និងប្រព័ន្ធផលិត។ យ៉ាងណា សម្រាប់មូលហេតុនៃការចាកចេញភ្លាមៗនេះមិនត្រូវបានបង្ហាញនោះទេ ខណៈ Tesla និង Lau មិនមានការឆ្លើយតបនឹងសំណើសុំការអត្ថាធិប្បាយរបស់ Reuters។

គួរជម្រាបថា លោក David Lau ស្ថិតក្នុងចំណោមអ្នកដឹកនាំក្រុមហ៊ុនដ៏លេចធ្លោដែលបានបង្ហាញខ្លួននៅលើឆាកជាមួយនាយកប្រតិបត្តិ (CEO) លោក Elon Musk ក្នុងអំឡុងពេលព្រឹត្តិការណ៍ទិវាវិនិយោគរបស់ Tesla ឆ្នាំ២០២៣។ តែយ៉ាងណា ការចាកចេញនេះទំនងមកពីការចូលប្រឡូកក្នុងវិស័យនយោបាយរបស់ Musk ខណៈភាគហ៊ុនរបស់ក្រុមហ៊ុន Tesla បានធ្លាក់ចុះប្រហែល ១០% នៅថ្ងៃសុក្រសប្តាហ៍នេះបន្ទាប់ពីការប្រកាសរបស់ប្រទេសចិនអំពីការដំឡើងពន្ធសងសឹកលើទំនិញរបស់សហរដ្ឋអាមេរិកជាការឆ្លើយតបទៅនឹងវិធានការពន្ធនាពេលថ្មីៗនេះរបស់ប្រធានាធិបតី Donald Trump៕