(ភ្នំពេញ)៖ ក្នុងបេសកកម្មរួមចំណែកក្នុងកិច្ចការសង្គម មនុស្សធម៌ និងសង្គ្រោះអាយុជីវិតមនុស្សដល់អ្នកជំងឺ ដែលកំពុងត្រូវការឈាម គ្រឹះស្ថានមីក្រូហិរញ្ញវត្ថុអម្រឹត មានមោទកភាពដែលសម្រេចបានជោគជ័យ «ដំណើរឆ្ពោះទៅកាន់ការចូលរួមបរិច្ចាគ ១,០០០ប្លោកឈាម» ជូនមជ្ឈមណ្ឌលជាតិ នាព្រឹកថ្ងៃទី២៦ ខែមេសា នៅទីស្នាក់ការអម្រឹត ខេត្តកំពង់ឆ្នាំង ដោយមានការចូលរួមពីសំណាក់បុគ្គលិក ប្រជាពលរដ្ឋ និងអាជ្ញាធរពាក់ព័ន្ធប្រមាណជាង ២០០អ្នកចូលរួម។  

លោក ដុស ឌីន អគ្គនាយក គ្រឹះស្ថានមីក្រូហិរញ្ញវត្ថុអម្រឹត បានថ្លែងថា នេះគឺលើកទី១០មកហើយ ដែលអម្រឹតបានចាប់ផ្តើមរៀបចំកម្មវិធីនេះឡើង ដោយចាប់ផ្តើមដំបូងក្នុងឆ្នាំ២០២៣។ កម្មវិធីបរិច្ចាគឈាមដោយស្ម័គ្រចិត្តរបស់អម្រឹត ធ្វើឡើងក្នុងគោលបំណង ដើម្បីចូលរួមលើកកម្ពស់ការយល់ដឹងពីសារៈសំខាន់នៃការបរិច្ចាគឈាម និងចូលរួមក្នុងសកម្មភាពមនុស្សធម៌សង្គម (ក្នុងនាមជាពលរដ្ឋ និងស្ថាប័ន) ក្នុងការជួយសង្គ្រោះអាយុជីវិត។

លោកបន្ថែមថា ក្នុងនាមស្ថាប័ន និងបុគ្គលិកអម្រឹត ពិតជាមានមោទកភាពយ៉ាងក្រៃលែង ដែលបានចូលរួម និងសម្រេចដំណើរឆ្ពោះទៅកាន់ ១,០០០ប្លោកឈាម ជូនមជ្ឈមណ្ឌលជាតិផ្តល់ឈាមនៅថ្ងៃនេះ។ ទន្ទឹមនឹងនោះលោកដុស ឌីន សូមថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌ និងការលះបង់របស់អ្នកចូលរួមបរិច្ចាគឈាមដោយស្ម័គ្រចិត្ត ដែលបានចូលរួមគាំទ្រសកម្មភាពសប្បុរសធម៌ដ៏មានអត្ថន័យមិនអាចកាត់ថ្លៃបាននេះ។ បើមិនមានការចូលរួមនេះទេ នោះដំណើរឆ្ពោះទៅកាន់ការចូលរួមបរិច្ចាគ ១,០០០ប្លោកឈាមនេះ ក៏មិនអាចសម្រេចបានផងដែរ។

ជាមួយគ្នានោះ អម្រឹត ប្ដេជ្ញាបន្តដំណើរក្នុងសកម្មភាពផ្តល់ឈាមជូនមជ្ឈមណ្ឌលជាតិផ្តល់ឈាម នៅក្នុងឆ្នាំបន្តបន្ទាប់ ដើម្បីចូលរួមចំណែកជួយដល់សង្គម សង្គ្រោះជីវិតមនុស្ស និងរួមចំណែកផ្គត់ផ្គង់ឈាមឱ្យបានគ្រប់គ្រាន់សម្រាប់អ្នកជំងឺ ដែលកំពុងត្រូវការឈាមនៅតាមមន្ទីរពេទ្យ។

លោក សុខ ប៉ូ ប្រធានមជ្ឈមណ្ឌលជាតិផ្តល់ឈាម បានលើកឡើងថា ការបរិច្ចាគឈាមពិតមានផលប្រយោជន៍ជាច្រើនដូចជា អាចដឹងពីសុខភាពផ្ទាល់ខ្លួន កាត់បន្ថយការលើសជាតិដែក ឈាមដែលផលិតថ្មីឡើងវិញ និងនាំឲ្យមានសុខភាពល្អ ជាពិសេសគឺឈាមដែលបរិច្ចាគអាចសង្គ្រោះអ្នកជំងឺ និងជួយឲ្យ «ស្តុកឈាម» មានគ្រប់គ្រាន់ដើម្បីសង្គ្រោះអ្នកជំងឺផ្សេងៗទៀត។

ក្នុងឱកាសនោះដែរ លោក យិន សាវ៉េន អភិបាលរងនៃគណៈអភិបាលខេត្តកំពង់ឆ្នាំង ដែលបានចូលរួមក្នុងកម្មវិធី បានថ្លែងអំណរគុណ និងកោតសសើរដល់ទឹកចិត្តរបស់ គ្រឹះស្ថានមីក្រូហិរញ្ញវត្ថុអម្រឹត បុគ្គលិក និង មជ្ឈមណ្ឌលជាតិផ្តល់ឈាម ដែលបានសហការក្នុងការរៀបចំកម្មវិធីសប្បុរសធម៏នេះឡើងមក។ ការបរិច្ចាគឈាមនេះ គឺជាកម្មវិធីសប្បុរសធម៌ដ៏ប្រពៃ និងជាកម្មវិធីដ៏ល្អដែលយើងទាំងអស់គ្នាគួរតែបន្តទៅទៀត ក្នុងបុព្វហេតុចូលរួមចំណែកក្នុងកិច្ចការងារសង្គម និងមនុស្សធម៌។

សូមជម្រាបថា កម្មវិធីបរិច្ចាគឈាមស្ម័គ្រចិត្ត បានប្រព្រឹត្តិទៅក្រោមអធិបតីភាព លោក យិន សាវ៉េន អភិបាលរងនៃគណៈអភិបាលខេត្តកំពង់ឆ្នាំង លោក ម៉ៅ សំណាង អភិបាលក្រុងកំពង់ឆ្នាំង លោក គង់ ច័ន្ទធា ប្រធានការិយាល័យ បង្ការនិងគ្រប់គ្រងជំងឺមន្ទីរសុខាភិបាលខេត្តកំពង់ឆ្នាំង លោក វ៉ាន់ សាវឿន តំណាងកាកបាទក្រហមខេត្តកំពង់ឆ្នាំង លោក ដុស ឌីន អគ្គនាយកនៃគ្រឺះស្ថានមីក្រូហិរញ្ញវត្ថុ អម្រឹត លោកវេជ្ជបណ្ឌិត សុខប៉ូ ប្រធានមជ្ឈមណ្ឌលជាតិផ្តល់ឈាម ក្រុមគ្រូពេទ្យប្រមាណចំនួន២០នាក់ និងអ្នកចូលរួមបរិច្ចាគប្រមាណ២០០ អ្នកដែលនៅក្នុងនោះមាន មន្រ្តីប៉ូលីស ប្រជាពលរដ្ឋ និងបុគ្គលិកអម្រឹតក្នុងតំបន់កំពង់ឆ្នាំង។

បច្ចុប្បន្ន អម្រឹតមានមោទនភាពជាគ្រឹះស្ថានហិរញ្ញវត្ថុឈានមុខគេមួយក្នុងចំណោមគ្រឹះស្ថានហិរញ្ញវត្ថុចំនួន ១0 នៅក្នុងប្រទេសកម្ពុជាដែលផ្តល់ផលវិជ្ជមានដល់សង្គម ។អម្រឹត បាននឹងកំពុងបម្រើអតិថិជនជាង ៦00,000នាក់ ដែលជាកសិករមានចំណូលទាប សហគ្រាសធុនតូច តូចបំផុត និងមធ្យម ។អម្រឹតមានសាខាចំនួន១៥០ ក្នុង២៤ រាជធានី-ខេត្តទូទាំងប្រទេស និងមានបុគ្គលិកជាង ៤,៧០០នាក់ កំពុងបម្រើការងារ។

អម្រឹត គឺជាក្រុមហ៊ុនបុត្រ សម្ព័ន្ធរបស់ Bank SinoPac (ធនាគារ សាយណូផេក) គឺជាភាគទុនិកធំនៅក្នុងអម្រឹត រួមជាមួយនឹងភាគទុនិកចំនួន០២ផ្សេងទៀត ដែលជាស្ថាប័នអន្តរជាតិ មានកិត្តិនាម និងត្រូវបានទទួលស្គាល់ថា ជាស្ថាប័នដែលមានភាពច្នៃប្រឌិត និងទំនួលខុសត្រូវខ្ពស់ផ្នែកសង្គម ។ក្នុងដំណើរវិវត្តន៍ និងការរីកចម្រើនរបស់ខ្លួន អម្រឹតបន្តបំពេញបេសកកម្មក្នុងការផ្តល់សេវាហិរញ្ញវត្ថុ ដែលស្របតាមតម្រូវការចាំបាច់របស់អតិថិជន៕