(បរទេស)៖ ក្រុមហ៊ុនផលិតអាគុយរបស់កូរ៉េខាងត្បូង LG Energy Solution (LGES) នៅថ្ងៃពុធសប្តាហ៍នេះបានប្រកាសពីការកើនឡើង ១៣៨% នៅក្នុងប្រាក់ចំណេញត្រីមាសទី១ រប​ស់ខ្លួន ដោយសារអត្រាប្តូរប្រាក់បរទេសអំណោយផលបានជួយទប់ស្កាត់ផលប៉ះពាល់នៃការថយចុះនៃកំណើនការលក់រថយន្តអគ្គិសនីនៅក្នុងទីផ្សារក្រៅប្រទេស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣០ ខែមេសា ឆ្នាំ២០២៥។

LGES ដែលជាក្រុមហ៊ុនផ្គត់ផ្គង់អាគុយដ៏សំខាន់ដល់ក្រុមហ៊ុន Tesla, General Motors (GM) និង Hyundai Motor បានរាយការណ៍ពីប្រាក់ចំណេញប្រតិបត្តិការចំនួន ៣៧៥ ពាន់លានវ៉ុន (ប្រហែល ២៦១.៩៦ លានដុល្លារ) សម្រាប់ត្រីមាសទី១ ឆ្នាំ២០២៥ (សម្រាប់ខែមករាដល់ខែមីនា) ដែលស្របតាមការណែនាំមុន​ និងលើសពី ១៥៧ ពាន់លានវ៉ុនដែលរកបានកាលពីឆ្នាំមុន។
ការកើនឡើងប្រាក់ចំណេញនេះ ត្រូវបានគាំទ្រដោយអត្រាប្តូរប្រាក់បរទេសអំណោយផល ដោយសារប្រាក់វ៉ុនរបស់កូរ៉េខាងត្បូងបានធ្លាក់ចុះ ៨.៥% ធៀបនឹងប្រាក់ដុល្លារអាមេរិកបើធៀបនឹងឆ្នាំមុន។ ខណៈការធ្លាក់ថ្លៃរូបិយប័ណ្ណនេះបានអនុញ្ញាតឱ្យក្រុមហ៊ុន LGES បំប្លែងប្រាក់វ៉ុនកាន់តែច្រើនពីប្រាក់ចំណូលប្រាក់ដុល្លារអាមេរិករបស់ខ្លួន ដោយជួយការពារផលប៉ះពាល់នៃកំណើននៃការលក់រថយន្តអគ្គិសនីនៅក្នុងទីផ្សារក្រៅប្រទេស។ ទន្ទឹមនឹងនេះ ប្រាក់ចំណូលរបស់ LGES បានកើនឡើងតិចតួចចំនួន ២.២% ពីមួយឆ្នាំទៅមួយឆ្នាំដែលឈានដល់ចំនួន​ ៦.៣ ពាន់ពាន់លានវ៉ុន។ ទោះជាយ៉ាងណាក៏ដោយ LGES បានបង្ហាញថាបើគ្មានឥណទានពន្ធដែលទទួលបានក្រោមច្បាប់កាត់បន្ថយអតិផរណារបស់សហរដ្ឋអាមេរិកទេ វានឹងបានកត់ត្រាការបាត់បង់ប្រតិបត្តិការចំនួន ៨៣ ពាន់លានវ៉ុន ដោយបង្ហាញពីសារៈសំខាន់នៃការលើកទឹកចិត្តរបស់រដ្ឋាភិបាលក្នុងការរកប្រាក់ចំណេញរបស់ខ្លួន។

គួរជម្រាបថា អ្នកវិភាគក៏បានកត់សម្គាល់ផងដែរថា ការលក់រថយន្តអគ្គិសនី (EV) ដ៏រឹងមាំពីក្រុមហ៊ុន General Motors ដែលបានរាយការណ៍ពីការកើនឡើង ៩៤% នៃការចែកចាយរថយន្ត EV ក្នុងស្រុកដល់ ៣១,៨៨៧ គ្រឿងនៅក្នុងត្រីមាសទីមួយបានរួមចំណែកជាវិជ្ជមានដល់ប្រាក់ចំណូលរបស់ក្រុមហ៊ុន LGES៕