(បរទេស)៖ សារព័ត៌មាន Bloomberg បានរាយការណ៍នៅថ្ងៃចន្ទនេះថា ក្រុមហ៊ុន OpenAI បានយល់ព្រមទិញក្រុមហ៊ុនសរសេរកូដជំនួយដោយបញ្ញាសិប្បនិម្មិត Windsurf ក្នុងតម្លៃប្រហែល ៣ពាន់លានដុល្លារ។ របាយការណ៍​បាន​បន្ថែម​ថា កិច្ច​ព្រម​ព្រៀង​នេះ​មិន​ទាន់​បិទ​នៅ​ឡើយ​ទេ។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី០៦ ខែឧសភា ឆ្នាំ២០២៥។

ជុំវិញដំណឹងនេះ គ្រាន់តែទទួលបានភ្លាម Reuters បានទាក់ទងទៅសុំ OpenAI និង Windsurf ដើម្បីបំភ្លឺ ប៉ុន្តែមិនឆ្លើយតប។ Windsurf ដែលពីមុនត្រូវបានគេស្គាល់ថា Codeium ថ្មីៗនេះបានពិភាក្សាជាមួយអ្នកវិនិយោគរួមទាំង General Catalyst និង Kleiner Perkins ដើម្បីរៃអង្គាសមូលនិធិក្នុងតម្លៃ ៣ពាន់លានដុល្លារ។ នេះបើយោងតាម ​​Bloomberg News ។

ក្រុមហ៊ុននេះមានតម្លៃ ១.២៥ពាន់លានដុល្លារ កាលពីខែសីហាឆ្នាំមុន បន្ទាប់ពីការផ្តល់មូលនិធិចំនួន ១៥០លានដុល្លារដែលដឹកនាំដោយក្រុមហ៊ុនបណ្តាក់ទុន General Catalyst ។ អ្នកវិនិយោគផ្សេងទៀតនៅក្នុងក្រុមហ៊ុនរួមមាន Kleiner Perkins និង Greenoaks ។ កិច្ចព្រមព្រៀងដែលនឹងក្លាយជាការទិញយកដ៏ធំបំផុតរបស់ OpenAI រហូតមកដល់បច្ចុប្បន្ននឹងបំពេញបន្ថែមសមត្ថភាពសរសេរកូដរបស់ ChatGPT ។ ក្រុមហ៊ុនបាននឹងកំពុងដាក់ចេញនូវការកែលម្អលើការសរសេរកូដជាមួយនឹងការចេញនូវម៉ូដែលថ្មីនីមួយៗរបស់ខ្លួន ប៉ុន្តែការប្រកួតប្រជែងក៏កំពុងឡើងកំដៅខ្លាំងផងដែរ៕