(បរទេស)៖ កម្មវិធីផ្ញើសារទំនាក់ទំនងដែលប្រើប្រាស់ដោយអតីតទីប្រឹក្សាសន្តិសុខជាតិរបស់ប្រធានាធិបតីអាមេរិក Donald Trump លោក Mike Waltz បានប្រកាសនៅថ្ងៃច័ន្ទថា ផ្អាកសេវាកម្មជាបណ្តោះអាសន្ន បន្ទាប់ពីមានការលួចស្តាប់ដែលបានរាយការណ៍ និងបានលាតត្រដាងសារមួយចំនួន។ នាយកដ្ឋានសន្តិសុខជាតិ (DHS) បាននិយាយដាច់ដោយឡែកពីគ្នាថា មន្ត្រីគយបានបិទកម្មវិធីផ្ញើសារនៅលើឧបករណ៍របស់ពួកគេភ្លាមៗ។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី០៦ ខែមេសា ឆ្នាំ២០២៥។

Smarsh ដែលជាក្រុមហ៊ុនផ្តល់សេវាកម្ម Software មានមូលដ្ឋាននៅទីក្រុង Portland រដ្ឋ Oregon ដែលដំណើរការកម្មវិធី TeleMessage បានប្រកាសនៅក្នុងអ៊ីមែលថា ខ្លួនកំពុង «ស៊ើបអង្កេតឧប្បត្តិហេតុសុវត្ថិភាពដែលអាចកើតមាន» ហើយកំពុងផ្អាកសេវាកម្មទាំងអស់របស់ខ្លួន «ដោយមានការប្រុងប្រយ័ត្នខ្ពស់ជាងមុន»។ ជុំវិញព័ត៌មាននេះ ក្រុមហ៊ុន Smarsh មិន​បាន​ឆ្លើយ​តប​ភ្លាមៗ​ចំពោះ​សំណើ​សុំ​ព័ត៌មាន​លម្អិត​អំពី​ការ Hack ឡើយ។ DHS បាននិយាយនៅក្នុងអ៊ីមែលថា ភ្នាក់ងារគយ និងការពារព្រំដែនសហរដ្ឋអាមេរិកបាន «បិទ TeleMessage ភ្លាមៗ ដែលជាវិធានការប្រុងប្រយ័ត្ន»។ DHS បន្ថែមថា ការស៊ើបអង្កេតលើវិសាលភាពនៃការរំលោភបំពាននេះកំពុងបន្ត។

រូបថតរបស់ Reuters បានបង្ហាញថា លោក Mike Waltz បានប្រើប្រាស់កម្មវិធីផ្ញើសារ TeleMessage ដែលជាកម្មវិធីមិនផ្លូវការដ៏ពេញនិយមនៅលើទូរស័ព្ទរបស់គាត់ ដូចជាកម្មវិធី Signal ក្នុងអំឡុងពេលកិច្ចប្រជុំគណៈរដ្ឋមន្ត្រីកាលពីថ្ងៃពុធ។ លោក Waltz ត្រូវបានបណ្តេញចេញពីតំណែងនៅថ្ងៃបន្ទាប់ ដែលជាចំណាត់ការបិទបាំងភាពចម្រូងចម្រាសជុំវិញការបង្កើតក្រុម Signal របស់លោក ដើម្បីចែករំលែកព័ត៌មានថ្មីៗតាមពេលវេលាជាក់ស្តែង លើសកម្មភាពយោធារបស់សហរដ្ឋអាមេរិកនៅក្នុងប្រទេសយេម៉ែន។ ការជជែកនោះបានទាក់ទាញចំណាប់អារម្មណ៍ជាពិសេស ដោយសារតែ Waltz ឬនរណាម្នាក់ដែលប្រើគណនីរបស់គាត់បាន Add អ្នកកាសែតដ៏លេចធ្លោម្នាក់ទៅក្នុងក្រុមដោយចៃដន្យ។

មានការព្រួយបារម្ភអំពីសុវត្ថិភាពនៃការទំនាក់ទំនងរបស់ Waltz ត្រូវបានកើនឡើងបន្ថែមទៀត នៅពេលដែលត្រូវបានគេរាយការណ៍កាលពីថ្ងៃអាទិត្យថា ពួក Hacker បានទម្លាយចូលទៅក្នុងហេដ្ឋារចនាសម្ព័ន្ធរបស់ TeleMessage និងស្ទាក់ចាប់សារមួយចំនួនរបស់អ្នកប្រើប្រាស់របស់ខ្លួន។ គេហទំព័រព័ត៌មានបច្ចេកវិទ្យា 404 Media បាននិយាយថា ពួក Hacker បានផ្តល់ឱ្យពួកគេនូវសម្ភារៈលួចចូល ដែលគេហទំព័រព័ត៌មានមួយចំនួនអាចផ្ទៀងផ្ទាត់ដោយឯករាជ្យ៕