(បរទេស)៖ Foxconn ដែលជាក្រុមហ៊ុនផលិតគ្រឿងអេឡិចត្រូនិកកិច្ចសន្យាធំជាងគេបំផុតរបស់ពិភពលោក និងជាក្រុមហ៊ុនផលិត iPhone បានរាយការណ៍នៅថ្ងៃចន្ទសប្តាហ៍នេះថា ប្រាក់ចំណូលប្រចាំខែមេសារបស់ខ្លួនបានកើនឡើង ២៥.៥៤% ពីមួយឆ្នាំទៅមួយឆ្នាំដែលឈានដល់ចំនួន ៦៤១.៣៧ ពាន់លានដុល្លារតៃវ៉ាន់ (ប្រហែល ២១.៣២ ពាន់លានដុល្លារ) ដែលជាការកត់សម្គាល់ប្រាក់ចំណូលខែមេសាខ្ពស់បំផុតនៅក្នុងប្រវត្តិសាស្រ្តរបស់ខ្លួន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

កំណើននេះ ត្រូវបានគេឱ្យដឹងថាបានជំរុញជាចម្បងដោយតម្រូវការខ្លាំងនៅក្នុងផ្នែកផលិតផល Cloud និងបណ្តាញរបស់ខ្លួន ជាពិសេសការបញ្ជាទិញដែលទាក់ទងនឹងបញ្ញាសិប្បនិម្មិត AI ក៏ដូចជាការកើនឡើងនៃផលិតផលកុំព្យូទ័រ និងសមាសធាតុមួយចំនួន។ Foxconn រំពឹងថានឹងមានកំណើនក្នុងត្រីមាសទី២ ឆ្នាំ២០២៥ បើធៀបនឹងរយៈពេលដូចគ្នាកាលពីឆ្នាំមុន ទោះបីជាវាបានកត់សម្គាល់ថាកត្តាតាមរដូវកាល និងការផ្លាស់ប្តូរផលិតផលអាចបន្ថយល្បឿននៃត្រីមាសក៏ដោយ។ Foxconn បានសង្កត់ធ្ងន់ថា «ផលប៉ះពាល់នៃការវិវត្តន៍នៃស្ថានភាពនយោបាយ និងសេដ្ឋកិច្ចសកលនឹងត្រូវការការតាមដានយ៉ាងជិតស្និទ្ធជាបន្ត»។

គួរជម្រាបថា ប្រាក់ចំណូលរបស់ Foxconn សម្រាប់រយៈពេល ៤ ខែដំបូងនៃឆ្នាំ២០២៥ ត្រូវបានក្រុមហ៊ុនរំពឹងថានឹងឈានដល់ ២.២៨ ពាន់ពាន់លានដុល្លារតៃវ៉ាន់ កើនឡើងជិត ២៥% ពីមួយឆ្នាំទៅមួយឆ្នាំ ដែលបង្កើតកំណត់ត្រាថ្មីសម្រាប់រយៈពេលនេះ៕