(បរទេស)៖ ក្រុមហ៊ុន Nvidia ត្រូវបានគេរាយការណ៍មកថាកំពុងរៀបចំបញ្ចេញកំណែបច្ចុប្បនុ្នភាពថ្មីនៃបន្ទះឈីបបញ្ញាសិប្បនិម្មិត H20 របស់ខ្លួនជាពិសេសសម្រាប់ទីផ្សារប្រទេសចិនក្នុងរយៈពេលពីរខែខាងមុខ ដើម្បីអនុវត្តតាមការរឹតបន្តឹងការនាំចេញថ្មីរបស់សហរដ្ឋអាមេរិកលើគំរូបន្ទះឈីបដើម។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៩ ខែឧសភា ឆ្នាំ២០២៥។

យោងតាមប្រភពពីរមិនបង្ហាញអត្តសញ្ញាណបានប្រាប់ Reuters ថាក្រុមហ៊ុនផលិតបន្ទះឈីបរបស់សហរដ្ឋអាមេរិក Nvidia បានជូនដំណឹងដល់អតិថិជនចិនធំៗ រួមទាំងអ្នកផ្តល់សេវាកុំព្យូទ័រ cloud ឈានមុខគេថា ខ្លួនមានបំណងបញ្ចេញបន្ទះឈីប H20 ដែលបានកែប្រែនៅក្នុងខែកក្កដាខាងមុខ។ បន្ទះឈីបដែលបានកែប្រែនេះ នឹងត្រូវបានកាត់បន្ថយសមត្ថភាពយ៉ាងខ្លាំង ព្រមទាំងការថយចុះនៃសមត្ថភាពចងចាំ ដើម្បីបំពេញតាមកម្រិតបច្ចេកទេសដែលបានកំណត់ដោយរដ្ឋាភិបាលសហរដ្ឋអាមេរិក ដែលឥឡូវនេះទាមទារអាជ្ញាប័ណ្ណនាំចេញសម្រាប់បន្ទះឈីប H20 គំរូដើមទៅកាន់ប្រទេសចិន។

បន្ទះឈីប H20 គំរូដើម ជាបន្ទះឈីប AI ទំនើបបំផុតរបស់ Nvidia ដែលត្រូវបានអនុញ្ញាតឱ្យដាក់លក់នៅក្នុងប្រទេសចិន បានប្រឈមមុខនឹងឧបសគ្គធំមួយ បន្ទាប់ពីមន្ត្រីសហរដ្ឋអាមេរិកបានជូនដំណឹងដល់ Nvidia ថាវានឹងត្រូវការអាជ្ញាប័ណ្ណនាំចេញសម្រាប់ការដឹកជញ្ជូនទៅកាន់ប្រទេសចិន។ ជាការឆ្លើយតប Nvidia បានបង្កើតលក្ខណៈបច្ចេកទេសថ្មីដែលបន្ទាបសមត្ថភាពដំណើរការរបស់បន្ទះឈីប ដើម្បីជៀសផុតពីការរឹតបន្តឹងទាំងនេះ ដែលអនុញ្ញាតឱ្យក្រុមហ៊ុនដ៏ធំនេះរក្សាវត្តមាននៅក្នុងទីផ្សារដ៏ធំមួយរបស់ខ្លួន ទោះបីជាមានការរឹតបន្តឹងការគ្រប់គ្រងរបស់សហរដ្ឋអាមេរិកលើបច្ចេកវិទ្យាផលិតផលពាក់កណ្តាលសម្រេច semiconductor កម្រិតខ្ពស់ក៏ដោយ។

គួរជម្រាបថា ការរឹតបន្តឹងរបស់រដ្ឋាភិបាលសហរដ្ឋអាមេរិកឆ្លុះបញ្ចាំងពីការព្រួយបារម្ភអំពីបច្ចេកវិទ្យាផលិតផលពាក់កណ្តាលសម្រេច semiconductor កម្រិតខ្ពស់ដែលរួមចំណែកដល់ AI និងសមត្ថភាពយោធារបស់ប្រទេសចិន ខណៈដែលប្រទេសនេះ គឺជាទីផ្សារដ៏ធំទី២ របស់ Nvidia នឹងមានចំនួន ១៧ ពាន់លានដុល្លារនៅក្នុងប្រាក់ចំណូល​ ឬ ១៣% នៃការលក់សរុបរបស់ Nvidia នៅក្នុងឆ្នាំ២០២៤។ ទន្ទឹមនឹងនេះ Nvidia រំពឹងថានឹងមានផលប៉ះពាល់ផ្នែកហិរញ្ញវត្ថុយ៉ាងសំខាន់ដោយសារតែផលិតផលក និងការលក់ដែលរងផលប៉ះពាល់ដោយច្បាប់ថ្មីទាំងនេះ ដោយមានការខាតបង់ដែលអាចកើតមានប្រហែល ៥.៥ ពាន់លានដុល្លារ៕