(បរទេស)៖​ ក្រុមហ៊ុន Moltiply Group របស់ប្រទេសអ៊ីតាលីបានដាក់ពាក្យបណ្ដឹងចំនួន ២.៩៧ ពាន់លានអឺរ៉ូ (ប្រហែល ៣.៣៤ ពាន់លានដុល្លារ) ប្រឆាំងនឹង Alphabet ដែលជាមេធំរបស់​ Google ដោយចោទប្រកាន់ក្រុមហ៊ុនបច្ចេកវិទ្យាយក្សនេះពីបទបំពានលើទីតាំងទីផ្សារលេចធ្លោរបស់ខ្លួន ដូចដែលបានទទួលស្គាល់ពីមុនដោយតុលាការយុត្តិធម៌សហភាពអឺរ៉ុប។ នេះបើយោងតាមការចេញផ្សាយដោយទីភ្នាក់ងារសារព័ត៌មាន​ Reuters នៅថ្ងៃទី១០ ខែឧសភា ឆ្នាំ២០២៥។

Multiply គឺជាក្រុមហ៊ុនដំណើរការគេហទំព័រប្រៀបធៀបតម្លៃអ៊ីតាលីដ៏ពេញនិយម Trovaprezzi.it។ Moltiply បាននិយាយនៅក្នុងសេចក្តីថ្លែងការណ៍មួយថា សកម្មភាពរបស់ Google ថាបានរារាំងដល់កំណើននៃក្រុមហ៊ុនបុត្រសម្ព័ន្ធរបស់ខ្លួន 7Pixel ចន្លោះឆ្នាំ ២០១០ និង ២០១៧ ដោយពេញចិត្តនឹង Google Shopping ជំនួសវិញ។ កាសែតអ៊ីតាលី Corriere della Sera បានឱ្យដឹងថា​ បណ្តឹងនេះត្រូវបានដាក់នៅក្នុងតុលាការទីក្រុង Milan ខណៈមិនបង្ហាញពីរបាយការណ៍លម្អិតនោះទេ។

អ្នកនាំពាក្យរបស់ Google បាននិយាយនៅក្នុងសេចក្តីថ្លែងការណ៍មួយដោយច្រានចោលយ៉ាងដាច់អហង្ការចំពោះការទាមទារការខូចខាតឯកជនចំនួន ២.៩៧ ពាន់លានអឺរ៉ូរបស់ Moltply នេះ ដោយហៅការចោទប្រកាន់ថា «ហួសហេតុ» ហើយនិយាយថាក្រុមហ៊ុននេះមិនយកចិត្តទុកដាក់ចំពោះភាពជោគជ័យ និងការរីកចម្រើននៃឧស្សាហកម្មទិញទំនិញប្រៀបធៀបនៅអឺរ៉ុប។

គួរជម្រាបថា គណៈកម្មការអឺរ៉ុបបានពិន័យ Google ដែលជាម៉ាស៊ីនស្វែងរកអ៊ីនធឺណិតដ៏ពេញនិយមបំផុតរបស់ពិភពលោកក្នុងឆ្នាំ ២០១៧ សម្រាប់ការប្រើប្រាស់សេវាកម្មទិញទំនិញប្រៀបធៀបតម្លៃផ្ទាល់ខ្លួន ដើម្បីទទួលបានអត្ថប្រយោជន៍មិនយុត្តិធម៌ជាងគូប្រជែងអឺរ៉ុបតូចៗ៕