(បរទេស)៖ របាយការណ៍ថ្មីពី FT បានឲ្យដឹងថា ក្រុមហ៊ុនបញ្ញាសប្បនិម្មិត OpenAI និង Microsoft កំពុងស្ថិតក្នុងដំណាក់ការចរចាយ៉ាងសំខាន់មួយ ដើម្បីកំណត់ជំហានថ្មីក្នុងកិច្ចសហប្រតិបត្តិការរបស់ពួកគេ។ ការចរចានេះអាចបើកផ្លូវឲ្យ OpenAI ប្រែចេញពីក្រុមហ៊ុនមិនរកប្រាក់ចំណេញ ទៅជាក្រុមហ៊ុនរកប្រាក់ចំណេញ និងអាចចេញផ្សាយភាគហ៊ុននៅពេលអនាគត។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី១២ ខែឧសភា ឆ្នាំ២០២៤។
Microsoft ដែលបានវិនិយោគលើសពី ១៣ពាន់លានដុល្លារនៅក្នុង OpenAI តាំងពីឆ្នាំ២០១៩ កំពុងពិចារណាអំពីភាគហ៊ុនរបស់ខ្លួនក្នុងស្ថាប័នបញ្ញាសប្បនិម្មិតមួយនេះ។ ក្នុងការប្តូរនេះ Microsoft ប្រហែលជាទាមទារសិទ្ធិប្រើប្រាស់បច្ចេកវិទ្យា AI ដ៏ឈានមុខរបស់ OpenAI បន្ថែមទៀត ពីបច្ចុប្បន្នដល់ឆ្នាំ២០៣០។ យ៉ាងណាមិញ ជុំវិញរបាយការណ៍ខាងលើនេះ ក្រុមហ៊ុន Microsoft បានបដិសេធមិនធ្វើអត្ថាធិប្បាយ ខណៈ OpenAI មិនបានឆ្លើយតបភ្លាមៗចំពោះសំណើសុំការអត្ថាធិប្បាយរបស់ Reuters ទេ។
OpenAI បានប្រាប់វិនិយោគិនថា ខ្លួននឹងចែករំលែកចំណែកតូចមួយនៃប្រាក់ចំណូលជាមួយអ្នកគាំទ្រដ៏ធំបំផុតរបស់ខ្លួន នៅពេលដែលវាឈានទៅមុខជាមួយនឹងការរៀបចំរចនាសម្ព័ន្ធឡើងវិញ។ នេះបើតាមព័ត៌មានដែលបានរាយការណ៍កាលពីសប្តាហ៍មុន។ នៅក្នុងខែមករា ក្រុមហ៊ុន Microsoft បានផ្លាស់ប្តូរលក្ខខណ្ឌមួយចំនួននៃកិច្ចព្រមព្រៀងជាមួយ OpenAI បន្ទាប់ពីបានចូលទៅក្នុងការបណ្តាក់ទុនរួមគ្នាជាមួយ Oracle និង ក្រុមហ៊ុន SoftBank របស់ជប៉ុន ដើម្បីបង្កើតមជ្ឈមណ្ឌលទិន្នន័យសិប្បនិម្មិតថ្មីរហូតដល់ ៥០០ពាន់លានដុល្លារនៅសហរដ្ឋអាមេរិក។
ទោះជាយ៉ាងណា ការផ្លាស់ប្តូរនេះក៏ជួបមតិរិះគន់ ជាពិសេសពីសំណាក់ លោក Elon Musk ដែលលើកឡើងថា វាប៉ះពាល់ដល់បេសកកម្មដើមរបស់ OpenAI ដែលជាការអភិវឌ្ឍ AI សម្រាប់ផលប្រយោជន៍សាធារណៈ។ បច្ចុប្បន្ន OpenAI នៅតែស្ថិតនៅក្រោមការគ្រប់គ្រងដោយអង្គការមិនរកប្រាក់ចំណេញ។ ពួកគេកំពុងប្រឹងប្រែងរកសមតុល្យរវាងការរំពឹងទុកពីអ្នកវិនិយោគ និងបេសកកម្មដើម ខណៈពេលដែលត្រូវជួបប្រទះនឹងការត្រួតពិនិត្យផ្នែកច្បាប់នៅរដ្ឋ California និង Delaware៕
