(បរទេស)៖ សារព័ត៌មាន Bloomberg បានរាយការណ៍នៅថ្ងៃសុក្រសប្តាហ៍នេះថា ក្រុមហ៊ុនបច្ចេកវិទ្យាយក្ស OpenAI គ្រោងនឹងជួយអភិវឌ្ឍមជ្ឈមណ្ឌលទិន្នន័យដ៏ធំមួយនៅទីក្រុង Abu Dhabi ប្រទេសអារ៉ាប់រួម ដែលអាចក្លាយជាមជ្ឈមណ្ឌលធំបំផុតមួយក្នុងពិភពលោក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៧ ខែឧសភា ឆ្នាំ២០២៥។
គម្រោងនេះត្រូវបានគេរំពឹងថានឹងមានសមត្ថភាព ៥ ជីហ្គាវ៉ាត់ ដែលធ្វើឱ្យវាក្លាយជាការពង្រីកដ៏សំខាន់នៃមហិច្ឆតាហេដ្ឋារចនាសម្ព័ន្ធ AI សកលរបស់ OpenAI។ របាយការណ៍ពី Bloomberg ដដែលបានឱ្យដឹងទៀតថា ការចូលរួមរបស់ក្រុមហ៊ុន OpenAI នៅមិនទាន់ត្រូវបានបញ្ចប់នៅឡើយនោះទេ ប៉ុន្តែការប្រកាសជាផ្លូវការអាចនឹងមកដល់ក្នុងពេលដ៏ខ្លីខាងមុខនេះ។ យ៉ាងណាមិញ ជុំវិញព័ត៌មានលម្អិតអំពីរបាយការណ៍នេះ OpenAI មិនទាន់មានការឆ្លើយតបលើសំណើរសុំការអត្ថាធិប្បាយនៅឡើយនោះទេ។
គួរជម្រាបថា ប្រទេសអេមីរ៉ាត់អារ៉ាប់រួម (UAE) និងសហរដ្ឋអាមេរិកនៅថ្ងៃព្រហស្បតិ៍សប្តាហ៍នេះ បានចុះហត្ថលេខាលើកិច្ចព្រមព្រៀងដ៏សំខាន់មួយសម្រាប់ UAE ដើម្បីសាងសង់បរិវេណសាលាបញ្ញាសិប្បនិម្មិត (AI) ដ៏ធំបំផុតនៅខាងក្រៅសហរដ្ឋអាមេរិក ដែលមានទីតាំងនៅ Abu Dhabi។ រោងចក្រនេះ ត្រូវបានគេបង្ហើបឱ្យដឹងថានឹងគ្របដណ្តប់លើផ្ទៃដីប្រហែល ១០ ម៉ាយការ៉េ ហើយនឹងប្រើប្រាស់ថាមពលស្មើនឹងម៉ាស៊ីនរ៉េអាក់ទ័រនុយក្លេអ៊ែរចំនួន ៥ ដោយកាត់បន្ថយហេដ្ឋារចនាសម្ព័ន្ធ AI ដែលមានស្រាប់ដោយ OpenAI ឬដៃគូប្រកួតប្រជែងរបស់វា៕
