(ភ្នំពេញ)៖ អចលនទ្រព្យ ត្រូវបានចាត់ទុកថាជាប្រភេទទ្រព្យដែលមានតម្លៃខ្ពស់ហើយក៏អាចជាប្រភពរបរ ដែលអាចទទួលចំណូលដ៏មានស្ថិរភាពមួយតាមរយៈការដាក់ជួល ។ ម្ចាស់អចលនទ្រព្យ (កម្មសិទ្ធិករ ឬសិទ្ធិវន្ដ) ដែលដាក់ជួលអចលនទ្រព្យរបស់ខ្លួនត្រូវមានកាតព្វកិច្ច បង់ពន្ធលើថ្លៃឈ្នួលអចលនទ្រព្យ តាមច្បាប់កំណត់ ហើយក្នុងករណី ដែលម្ចាស់អចលនទ្រព្យ ខកខានមិនបានអនុវត្តការបង់ពន្ធ នឹងត្រូវរងការពិន័យ ។

តើអ្វីទៅជាពន្ធលើថ្លៃឈ្នួលអចលនទ្រព្យ? ហើយពន្ធនេះត្រូវបានកំណត់យ៉ាងដូចម្ដេច?

ដើម្បីយល់កាន់តែច្បាស់ កម្មវិធីយល់ដឹងផ្នែកច្បាប់របស់អង្គភាពសារព័ត៌មាន Fresh News សហការជាមួយ ក្រុមហ៊ុនមេធាវីកម្ពុជាសហប្រតិបត្តិការអន្ដរជាតិ សូមលើកយកប្រធានបទស្ដីពី ពន្ធលើថ្លៃឈ្នួលអចលនទ្រព្យ មកធ្វើការចែករំលែកជូនសិស្ស និស្សិត និងសាធារណជន ដូចខាងក្រោម។

ពន្ធលើថ្លៃឈ្នួលអចលនទ្រព្យ ជាពន្ធដែលត្រូវបានកំណត់យកលើប្រាក់ឈ្នួលដែលបានមកពីការជួលអចលនទ្រព្យ ដែលមានដូចជាអគារនិងសំណង់ (ផ្ទះ) ផ្សេងៗ យន្ដូបករណ៍ដែលជាប់ជាមួយគ្រឹះស្ថានឧស្សាហកម្ម ឋបនភណ្ឌពាណិជកម្ម ឧស្សាហកម្មដែលនៅនឹងកន្លែង អគារធំៗ ឬឃ្លាំងស្ដុកទំនិញ លំនៅឋានចល័តសម្រាប់ស្នាក់នៅឬប្រកបអាជីវកម្មផ្សេងៗ និងដីធ្លីដែលគ្មានសំណង់ ហើយប្រភេទនេះត្រូវបានកំណត់យកអត្រា ១០ (ដប់) ភាគរយនៃថ្លៃឈ្នួលអចលនទ្រព្យ ឬប្រាក់ឈ្នួលដុល ដែលជាប្រាក់ឈ្នួលដែលបានកំណត់ក្នុងកិច្ចសន្យា ឬកិច្ចព្រមព្រៀងជាមួយអ្នកជួល ។

ម្ចាស់អចលនទ្រព្យដែលមិនមែនជាអ្នកជាប់ពន្ធតាមរបបស្វ័យប្រកាស ដែលជួលអចលនទ្រព្យ ត្រូវបង់ពន្ធនេះ ជារៀងរាល់ខែយ៉ាងយឺតបំផុតត្រឹមថ្ងៃទី២០ នៃខែបន្ទាប់ពីខែដែលត្រូវបង់ប្រាក់ ក្នុងករណីដែលថ្លៃឈ្នួលត្រូវបានកំណត់ឱ្យបង់ប្រចាំខែ ឬយ៉ាងយឺតបំផុតត្រឹមថ្ងៃទី២០ នៃខែបន្ទាប់ពីខែដែលត្រូវធ្វើការទូទាត់ទៅតាមចំនួនទឹកប្រាក់សរុប ប្រសិនបើកិច្ចសន្យាតម្រូវឱ្យមានការបង់ប្រាក់សរុបសម្រាប់រយៈពេលច្រើនខែ ។

បន្ថែមពីនេះ ពន្ធលើថ្លៃឈ្នួលអចលនទ្រព្យក៏ត្រូវបានលើកលែងផងដែរ លើករណីដូចជា (១) ថ្លៃឈ្នួល ពីការ ជួលអចលនទ្រព្យ របស់ រាជរដ្ឋាភិបាល ឬ ក្រសួងស្ថាប័ន រាជរដ្ឋាភិបាល (២) ថ្លៃឈ្នួល ពីការជួល អចលនទ្រព្យ របស់ បេសកកម្មការទូតឬ កុងស៊ុល បរទេស អង្គការអន្តរជាតិ និង ទីភ្នាក់ងារសហប្រតិបត្តិការ បច្ចេកទេស របស់រដ្ឋាភិបាលនានា (៣) ថ្លៃឈ្នួលពី ការ ជួលអចលនទ្រព្យ របស់អង្គការ ឬ សមាគម ណាមួយ ដែលត្រូវបានរៀបចំឡើង និង ដំណើរការ សម្រាប់គោលដៅ សុទ្ធសាធខាង សាសនាសប្បុរសធម៌ វិទ្យាសាស្ត្រ អក្សរសាស្ត្រ ឬ អប់រំ និង គ្មានចំណែកណាមួយនៃថ្លៃឈ្នួល ត្រូវបានប្រើប្រាស់ ជាប្រយោជន៍ ឯកជន (៤) ប្រាក់ដែលអ្នកជួលបាន តម្កល់ទុកជា ប្រាក់ធានា ដែលត្រូវប្រគល់ជូនអ្នកជួល វិញ នៅ ពេលចប់កិច្ចសន្យា (៥) ថ្លៃឈ្នួល ដែល បានកាត់ទុក ប្រាក់ពន្ធ រួចហើយ ដោយ សហគ្រាស ជាអ្នកជាប់ពន្ធតាមរបបស្វ័យ ប្រកាស (៦) ថ្លៃឈ្នួល ពីការជួលអចលនទ្រព្យ របស់សហគ្រាស ជាអ្នកជាប់ពន្ធ តាមរបប ស្វ័ យប្រកាស ដែលបានគិតបញ្ចូល ក្នុងប្រាក់ ចំណូលជាប់ពន្ធ របស់សហគ្រាស រួចហើយ និង (៧) ថ្លៃឈ្នួលពីការជួលអចលនទ្រព្យចំពោះគ្រប់ករណីជួលទាំងឡាយដែលសរុបប្រាក់ឈ្នួលប្រចាំខែក្រោម ៥០០.០០០ (ប្រាំសែន) រៀល ។

សរុបសេចក្តីមក ម្ចាស់អចលនទ្រព្យ មានកាតព្វកិច្ច ធ្វើការបង់ពន្ធលើថ្លៃឈ្នួលអចលនទ្រព្យ ដែលខ្លួនដាក់ជួល ដោយស្របទៅតាមថិរវេលាដែលត្រូវបានកំណត់ក្នុងលិខិតបទដ្ឋានគតិយុត្តជាធរមាន ពុំនោះសោត នឹងរងនូវទណ្ឌកម្មផេ្សងៗ ដូចដែលមានចែងក្នុងច្បាប់ស្ដីពីសារពើពន្ធ ។

រៀបរៀងដោយ៖ លោកស្រីមេធាវី នូ ពិសី និងលោក លី លីនដូ ជាជំនួយការមេធាវី និងជាសមាជិកក្រុមការងាររៀបចំ និងផ្សព្វផ្សាយអត្ថបទច្បាប់ នៃក្រុមហ៊ុនមេធាវីកម្ពុជាសហប្រតិបត្តិការអន្តរជាតិ មានអាសយដ្ឋាននៅអគារស៊ីអាយស៊ី (CIC) លេខ ១២៦៥ ផ្លូវលំ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ទូរស័ព្ទទំនាក់ទំនងលេខ ០២៣ ៩៨៦ ២៤៥ / ០៧៨ ២៧២ ៧៨៥ អ៉ីម៉ែល៖ [email protected] គេហទំព័រ៖ www.cicfirm.com ហ្វេសប៊ុកផេក៖ Cambodia International Cooperation Law Firm ៕