(ភ្នំពេញ)៖ អបអរសាទរ កីឡាការិនីជឺជីតស៊ូជម្រើសជាតិកម្ពុជា ម៉ាប់ សុខហួយ បានឈ្នះខ្សែក្រវាត់ Absolute Pro Championship ក្នុងព្រឹត្តិការណ៍ AFG Open Championship ដែលប្រព្រឹត្តទៅនៅថ្ងៃទី 17-18 ខែឧសភា ឆ្នាំ2025 នៅសាកលវិទ្យាល័យ Rangsit ក្នុងទីក្រុងបាងកក ប្រទេសថៃ។

អ្វីដែលអស្ចារ្យវិញ្ញាសា Absolute Pro Division គឺជាវិញ្ញាសាតម្រូវធ្វើការប្រកួតក្នុងប្រភេទទម្ងន់បើកចំហដែលអត្តពលិកគ្រប់វិញ្ញាសាទម្ងន់ត្រូវប្រឈមមុខគ្នា ខណៈ សុខហួយ បានចូលប្រកួតទាំងខ្លួនមានមាឌតូច និងទម្ងន់ស្រាលបំផុតក្នុងចំណោមកីឡាការិនីផ្សេងក្នុងវិញ្ញាសានេះ។

ស្ថិតនៅវគ្គពាក់កណ្តាលផ្តាច់ព្រ័ត្រ សុខហួយ បានប្រកួតជាមួយកីឡាការិនី Lucy Greenway ដែលជាកីឡាការិនិម្ចាស់ខ្សែក្រវាត់ខ្មៅមកពីប្រទេស Wales ដោយយកឈ្នះដោយពិន្ទុ បន្ទាប់ពីការប្រកួតពេញ ៨នាទី។ ខណៈនៅវគ្គផ្តាច់ព្រ័ត្រ សុខហួយ បានយកឈ្នះកីឡាការនីលំដាប់កំពូលរបស់ម៉ាឡេស៊ី Mia Foo ដោយពិន្ទុ បន្ទាប់ពីការប្រកួតរយៈពេល ៨នាទីទៀត។

នេះ​ជា​ខ្សែក្រវាត់​ជើងឯក AFG លើក​ដំបូង​របស់​កម្ពុជា និង​បង្ហាញ​ពី​សមត្ថភាព​បច្ចេកទេស និង​ភាពហ្មត់ចត់របស់កីឡាការិនីកម្ពុជា សុខហួយ នៅលើ​ឆាក​អន្តរជាតិ។

តាមរយៈសហព័ន្ធ «យើងខ្ញុំសូមចូលរួមអបអរសាទរចំពោះ ម៉ាប់ សុខហួយ ចំពោះលទ្ធផលដ៏ល្អឥតខ្ចោះនេះ ហើយមានមោទនភាពយ៉ាងខ្លាំងចំពោះការខិតខំប្រឹងប្រែងរបស់នាង តំណាងឱ្យប្រទេសកម្ពុជាប្រកបដោយភាពអស្ចារ្យទៅតាមទម្រង់ផ្សេងៗ» ៕