(បរទេស)៖ យោងតាមរបាយការណ៍ពី Financial Time បានឲ្យដឹងថា ក្រុមហ៊ុន Trump Media & Technology Group (TMTG) ដែលជាក្រុមហ៊ុនម្ចាស់បណ្តាញសង្គម Truth Social និងមានទំនាក់ទំនងយ៉ាងជិតស្និទ្ធជាមួយប្រធានាធិបតីអាមេរិក Donald Trump នោះ ត្រូវបានរាយការណ៍មកថា កំពុងរៀបចំរៃអង្គាសប្រាក់ឲ្យបានចំនួន ៣ពាន់លានដុល្លារ ដើម្បីវិនិយោគនៅក្នុង រូបិយប័ណ្ណឌីជីថល ដូចជា Bitcoin។ នេះបើតាមការចេញផ្សាយដោយសារព័ត៌មាន Reuters នៅថ្ងៃទី២៧ ខែឧសភា ឆ្នាំ២០២៥។
ទឹកប្រាក់ចំនួន ៣ពាន់លានដុល្លារនេះនឹងមានចំនួន ២ពាន់លានដុល្លារ មកពីការលក់ភាគហ៊ុនថ្មី និង ១ពាន់លានដុល្លារតាមរយៈប្រាក់កម្ចីដែលអាចបម្លែងជាភាគហ៊ុនបាន។ គម្រោងនេះ ឆ្លុះបញ្ចាំងឲ្យឃើញពីគោលបំណងរបស់លោកត្រាំ ក្នុងការធ្វើឲ្យសហរដ្ឋអាមេរិកក្លាយជា «រដ្ឋធានីគ្រប់គ្រងរូបិយប័ណ្ណឌីជីថល» នៃពិភពលោក។ ការប្រកាសនេះ ត្រូវបានគេរំពឹងថានឹងធ្វើមុនព្រឹត្តិការណ៍សន្និបាតធំបំផុតមួយទាក់ទងនឹង Bitcoin នៅទីក្រុង Las Vegas ដែលត្រូវបានគេរំពឹងថានឹងមានវាគ្មិនសំខាន់ៗមកពីគ្រួសារ Trump រួមមាន JD Vance និងកូនប្រុសរបស់លោក Trump (Donald Jr. និង Eric)។
តម្លៃទីផ្សារបច្ចុប្បន្នរបស់ TMTG ត្រូវបានគេដឹងថាស្ថិតនៅប្រហែល ៦ពាន់លានដុល្លារ និងភាគហ៊ុនមានតម្លៃប្រមាណ ២៥.២ដុល្លារក្នុងមួយហ៊ុន។ ទោះបីគម្រោងមួយនេះ មានការចាប់អារម្មណ៍ពីអ្នកវិនិយោគ តែគេក៏បារម្ភដែរ អំពីការប៉ះពាល់ផ្នែកនយោបាយ និងការប៉ះពាល់ដល់ផ្លូវច្បាប់ ដោយសារគ្រួសារ Trump កាន់តែចូលរួមធ្វើអាជីវកម្មក្នុងវិស័យរូបិយប័ណ្ណឌីជីថល។
ជុំវិញការចេញផ្សាយរបាយការណ៍ខាងលើ Trump Media Group បានឆ្លើយតបទៅនឹងសំណើសុំការអត្ថាធិប្បាយ ទាំងពីររ៉យទ័រ និង Financial Time ថា «ព័ត៌មានក្លែងក្លាយ» ខណៈសេតវិមានមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ៕
