(ទីក្រុងឌុយបៃ)៖ ប្រទេសអារ៉ាប់រួម (UAE) បានប្រកាសជាផ្លូវការថា ប្រជាពលរដ្ឋទាំងអស់ដែលរស់នៅក្នុងប្រទេសនេះ នឹងទទួលបានសិទ្ធិចូលប្រើប្រាស់កម្មវិធី AI ChatGPT Plus ដោយឥតគិតថ្លៃ។ ChatGPT Plus គឺជាគម្រោងបង់ប្រាក់របស់កម្មវិធី chatbot បញ្ញាសិប្បនិម្មិត (AI) ដ៏ល្បីល្បាញរបស់ក្រុមហ៊ុន OpenAI។

គំនិតផ្តួចផ្តើមនេះ គឺជាផ្នែកមួយនៃភាពជាដៃគូយុទ្ធសាស្ត្ររវាងក្រុមហ៊ុន OpenAI និងរដ្ឋាភិបាលអារ៉ាប់រួម ដែលមានគោលបំណងជំរុញប្រទេសនេះឱ្យក្លាយជាមេដឹកនាំសកលលោកក្នុងវិស័យបញ្ញាសិប្បនិម្មិត។

កិច្ចសហការនេះ រួមបញ្ចូលទាំងការអភិវឌ្ឍ «Stargate UAE»» ដែលជាមជ្ឈមណ្ឌលទិន្នន័យ AI ដ៏ធំមួយនៅក្នុងទីក្រុង Abu Dhabi ដែលនឹងផ្ទុកនូវប្រព័ន្ធកុំព្យូទ័រ AI ទំហំយក្ស ដោយដំណាក់កាលដំបូងចំនួន ២០០មេហ្គាវ៉ាត់ ត្រូវបានគេរំពឹងថានឹងចាប់ផ្តើមដំណើរការនៅឆ្នាំក្រោយ។

ហេដ្ឋារចនាសម្ព័ន្ធនេះ នឹងគាំទ្រដល់ការរួមបញ្ចូលគ្នានៃបច្ចេកវិទ្យា AI កម្រិតខ្ពស់នៅក្នុងវិស័យនានារួមមាន ការអប់រំ សុខាភិបាល ថាមពល និងសេវាកម្មរដ្ឋាភិបាល។ ប្រជាពលរដ្ឋអាចរំពឹងទុកនូវការកើនឡើងនូវលទ្ធភាពទទួលបានឌីជីថល និងកំណើនបច្ចេកវិទ្យា ដែលជាលទ្ធផលនៃគំនិតផ្តួចផ្តើមនេះ។

ទោះជាយ៉ាងណាក៏ដោយ ព័ត៌មានលម្អិតជាក់លាក់ទាក់ទងនឹងនីតិវិធីនៃការដាក់ឱ្យប្រើប្រាស់ និងការចូលប្រើប្រាស់គម្រោង ChatGPT Plus ដោយឥតគិតថ្លៃ មិនទាន់ត្រូវបានបញ្ចេញនៅឡើយទេ។ ដូច្នេះហើយ គេណែនាំឱ្យប្រជាពលរដ្ឋបន្តតាមដានព័ត៌មានតាមរយៈបណ្តាញផ្លូវការរបស់ OpenAI និងរដ្ឋាភិបាលអារ៉ាប់រួម ដើម្បីទទួលបានព័ត៌មានថ្មីៗអំពីរបៀបចូលប្រើប្រាស់សេវាកម្មនេះ៕