(បរទេស)៖ យោងតាមទិន្នន័យពីបណ្ឌិតសភាបច្ចេកវិទ្យាព័ត៌មាន និងទំនាក់ទំនងចិន (CAICT) បានឱ្យដឹងថា ការលក់ទូរស័ព្ទដៃម៉ាកបរទេសនៅក្នុងប្រទេសចិន រួមទាំងក្រុមហ៊ុន iPhone របស់ក្រុមហ៊ុន Apple បានកើនឡើងគួរឱ្យកត់សម្គាល់ក្នុងខែមេសា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣១ ខែឧសភា ឆ្នាំ២០២៥។

ការគណនាដោយផ្អែកលើទិន្នន័យពី CAICT បានបង្ហាញថា ការនាំចេញទូរសព្ទម៉ាកបរទេសក្នុងខែមេសានៅក្នុងប្រទេសចិនបានកើនឡើងដល់ ៣.៥២ លានគ្រឿងពី ៣.៥០ លានគ្រឿងកាលពីឆ្នាំមុន។ ក្នុងនាមជាក្រុមហ៊ុនផលិតទូរស័ព្ទចល័តបរទេសដ៏ធំបំផុតនៅក្នុងទីផ្សារដែលគ្រប់គ្រងដោយស្មាតហ្វូនរបស់ប្រទេសចិន ដំណើរការរបស់ក្រុមហ៊ុន Apple បានដើរតួនាទីយ៉ាងសំខាន់នៅក្នុងទិន្នន័យរួមលើការលក់ទូរស័ព្ទម៉ាកបរទេសនៅក្នុងប្រទេសនេះ។

យ៉ាងណាមិញ ជុំវិញការកើនឡើងនៅក្នុងខែមេសាត្រូវបានប្រភពឱ្យដឹងថា កើតឡើងបន្ទាប់ពីការធ្លាក់ចុះការលក់ទូរស័ព្ទក្នុងត្រីមាសទី១ របស់ក្រុមហ៊ុន Apple នៅក្នុងប្រទេសចិនបានធ្លាក់ចុះ ៩%។

គួរជម្រាបថា ក្រុមហ៊ុន Apple បានប្រឈមមុខនឹងការប្រកួតប្រជែងកាន់តែខ្លាំងឡើងពីគូប្រជែងក្នុងស្រុក ហើយបានងាកទៅរកការកាត់បន្ថយតម្លៃ ដើម្បីរក្សាការប្រកួតប្រជែង។ ខណៈដែលវេទិកាពាណិជ្ជកម្មអេឡិចត្រូនិករបស់ចិន កំពុងផ្តល់ការបញ្ចុះតម្លៃរហូតដល់ ២,៥៣០ យន់ (ប្រហែល ៣៥១ ដុល្លារ) លើម៉ូដែល iPhone 16 ចុងក្រោយបង្អស់របស់ Apple នៅដើមខែនេះ៕