(បរទេស)៖​ ក្នុងខែនេះ វេទិកា AI ឈានមុខគេបំផុតរបស់ចិនបានធ្វើអ្វីមួយមិនធ្លាប់មានពីមុនមក​ ពោលគឺបាន​បិទទាំងស្រុង​ អំឡុងពេលសិស្សប្រឡងថ្នាក់ជាតិ។ ចាប់ពីថ្ងៃទី៧​ ដល់ថ្ងៃទី១០​ ខែមិថុនា ក្រុមហ៊ុនចិនដូចជា ByteDance, Alibaba និង Tencent បានសហការគ​្នា​ ដើម្បីផ្អាកមុខងារ​ chatbot ដោយឲ្យវាឈប់ដំណើរការ និងទប់ស្កាត់សំណួរទាក់ទងនឹងការប្រឡងទាំងអស់ ដើម្បីបង្ការ ការបន្លំឬលួចចម្លងក្នុងការប្រឡង។

ការប្រឡងចូលមហាវិទ្យាល័យនេះ​ ត្រូវបានគេស្គាល់ថាជាការប្រឡងដែលតឹងរឹងបំផុតមួយនៅលើពិភពលោក។ សិស្សជាង ១៣លាននាក់បានចូលរួមការប្រឡងនេះជារៀងរាល់ឆ្នាំ ហើយដេីម្បីមានសិទ្ធចូលរៀននៅសាកលវិទ្យាល័យល្បីៗ។ ដើម្បីធានាឲ្យមានភាពត្រឹមត្រូវ ក្រុមហ៊ុន AI ដូចជា Doubao, DeepSeek និង Kimi របស់ Moonshot បានបិទសេវាកម្មសំខាន់ៗរបស់ខ្លួន។ សិស្សដែលព្យាយាមប្រេី​ AI ដេីម្បីសួរ សំណួរឬរូបភាពនៃការប្រឡងបានជួបនឹងសារបដិសេធថា៖ “មុខងារនេះមិនអាចប្រើបានបណ្តោះអាសន្ន”។ នេះមិនមែនជាកំហុសប្រព័ន្ធទេ — ប៉ុន្តែជាគោលនយោបាយច្បាស់លាស់មួយដែលកំណត់ឡេីង​ ដេីម្បីភាពត្រឹមត្រូវ។

អាជ្ញាធរចិនក៏បានប្រើប្រាស់ AI ដើម្បីត្រួតពិនិត្យអាកប្បកិរិយានៅក្នុងបន្ទប់ប្រឡងផងដែរ ដោយប្រើបច្ចេកវិទ្យាចាប់សញ្ញា និងសម្លឹងឃើញដើម្បីស្វែងរកសកម្មភាពមិនប្រក្រតី​ ដែលនេះជាដំណើរបង្រួមជាតិនៃការត្រួតពិនិត្យ ដើម្បីថែរក្សាជំនឿជាក់លើប្រព័ន្ធអប់រំដែលកំពុងជួបបញ្ហាពីបច្ចេកវិទ្យាគ្រប់ជ្រុងជ្រោយ។

គួរជម្រាបថា​ ចលនានេះបង្ហាញថា បច្ចេកវិទ្យា AI មិនត្រឹមតែបំប្លែងវិធីរៀនទេ ប៉ុន្តែបង្ខំឲ្យប្រព័ន្ធទាំងមូលត្រូវកែប្រែគោលនយោបាយ។​ ចិនកំពុងពិចារណាឲ្យមានការបិទសេវា AI ជាប្រចាំក្នុងអំឡុងពេលប្រឡងជាតិនាពេលអនាគត ដើម្បីបញ្ជាក់ថាទោះបីជា​ AI ខ្លាំងប៉ុណ្ណាក៏ដោយ ក៏មានដែនកំណត់ក្នុងពេលប្រឡងដែរ៕